Президент Садыр Жапаров никаб, паранжа кийгендерге түшүндүрүү иштери жүрүп жатканы жана аларга айып салынары боюнча пикирин билдирди. 5-апрелде мамлекеттик “Кабар” агенттигине курган маегинде ал мамлекет дин тармагына кийлигишпей турганын, жаңы кабыл алынган мыйзамда бардык укук Кыргызстан мусулмандарынын дин башкармалыгына жана Аалымдар кеңешине берилгенин тактаган.
Ал хижаб кыргыз тилиндеги жоолук деген эле сөз экенин жана буга каршылык жоктугун, болгону аны салынгандар жүзүн ачык алып жүрүшү керектигин белгиледи.
“Ал эми никаб деген көзү гана ачык болгон баш кийим. Паранжа дегенди өзүңөр жакшы билесиңер, жүзүн толук жаап жүргөн баш кийим. Экөө тең бизге муфтият тарабынан тыюу салынган. Ошол үчүн муфтияттын фатвасын биздин жарандар милдеттүү түрдө аткарыш керек. Биздин илгертен берки салтыбызда деле энелерибиз, эже-карындаштарыбыз эч качан паранжа кийген эмес. Ошондуктан жөн эле экилене бериштин кереги жок”, - деген Жапаров.
Укук коргоо органдары “бөрк ал десе, баш алмай” саясат жүргүзбөшү керектигин, жоолук салынган жарандарга эч кандай чектөө болбошу зарылдыгын айткан.
Ал жүзүн такыр жаап алганга каршы туруу коомдук коопсуздук үчүн маанилүү экенин белгилеп, коомчулукту буга чогуу каршы турууга үндөдү.
3-апрелде Улуттук коопсуздук боюнча мамлекеттик комитет “Дин тутуу эркиндиги жана диний бирикмелер жөнүндө” мыйзам боюнча Жалал-Абад шаарынын жана Сузак районунун аймагында элге түшүндүрүү иштери жүргүзүлгөнүн кабарлаган. Анда коомдук жайларда никаб кийип жүргөндөргө эскертүү берилип, мыйзамды бузгандар административдик жоопкерчиликке тартылары белгиленген.
Президент Садыр Жапаров быйыл январь айында бул мыйзамга кол койгон. Документке ылайык, үймө-үй кыдырып даават айткандарга, коомдук жайларда жүзүн жашырган кийим кийгендерге 20 миң сомдон айып пул салынат.
Никаб - аялдардын көзү гана ачылган, калган жүзүн жаап турган баш кийим. Айрым мусулман аялдар никабды хижабдын эң жакшы түрү деп эсептешет. (TAb)
(
Шерине