Өзбекстандын президенти Шавкат Мирзиёев 4-апрелде Самарканд шаарында өткөн Европа Биримдиги – Борбор Азия саммитинде сүйлөгөн сөзүндө аймактык коопсуздук жана Ооганстан менен кызматташуу маселесине токтолду.
"Европалык өнөктөштөрдүн терроризмге каршы күрөшүү маселелери боюнча диалог баштоо сунушун колдойбуз", - деди Өзбекстандын башчысы.
Ал BOMCA жана CADAP программаларынын алкагында кызматташууну кеңейтүү маанилүү экенин кошумчалады.
Өзбек президенти ошол эле кезде Өзбекстан Ооганстанды тынчтык жолу менен өнүктүрүү боюнча саясий сүйлөшүүлөрдү улантууга даяр экенин билдирди.
"Тилекке каршы, эл аралык коомчулук бул өлкөдөн болуп жаткан коркунучту баалабай жатат. Биз ооган тарапты аймактык экономикалык процесстерге, анын ичинде инвестициялык жана инфраструктуралык долбоорлорду ишке ашыруу жана социалдык секторду калыбына келтирүү иштерине тартууну зарыл деп эсептейбиз", - деди ал.
Өзбекстандын президенти эл аралык коомчулук менен азыркы ооган бийлигинин ортосунда конструктивдүү диалог түзүүнүн маанилүүлүгүн түшүнүүгө жана колдоого үмүттөнөрүн билдирди.
"Борбор Азия–Европа Биримдиги” саммитине Казакстандын, Кыргызстандын, Өзбекстандын, Тажикстандын, Түркмөнстандын лидерлери жана Еврокомиссиянын президенти Урсула фон дер Ляйен, Европа кеңешинин президенти Антониу Кошта катышты.
Саммиттин алдында укук коргоочулар Евробиримдиктин лидерлерин аймактагы адам укуктарынын абалына көңүл бурууга чакырышкан. (AiA)
Шерине