4-апрелде Чехиянын баш калаасы Прагада уюштурулган адам аткезчилигине каршы күрөштөгү диаспоралардын ролуна арналган жыйынга Жогорку Кеңештин өкүлдөрү, ЕККУнун, Эл аралык миграция уюмунун өкүлдөрү, Чехиядагы жумушка орноштуруу уюмунун адистери жана Европадагы диаспоралардын активисттери катышты. Иш-чараны Чехиядагы кыргызстандыктардын "Ала-Тоо" уюму уюштурду.
Эл аралык миграция уюмунун адиси Зденек Свобода эмгек мигранттарын мекенине кайтарууда укуктук жана каржылык колдоону ишке ашырган программа тууралуу айтты:
"Эл аралык миграция уюмунун бул программасы өз ыктыяры менен мекенине кайткан мигранттарга укуктук, каржылык колдоо көрсөтөт. Үйүнө кайтып барганда өз коомуна реинтеграция болуп, бутуна турууга 2000 евро берилет. Бул каражатка кайтып баргандар чакан иш ачып, жаңы адистикке үйрөнүп же үй-жай маселесин чечүүгө жумшай алат. Бир жылда бул программа Чехиядан мекенине кайткан тогуз өзбек мигрантына колдоо көрсөттү".
Иш-чарада Жогорку Кеңештин төрагасына караштуу Миграция маселелери, адам аткезчилигине каршы аракеттенүү боюнча катчылыгынын башчысы Улан Ногойбаев адам сатууну токтотуунун эффективдүү механизмдери жана коомчулукту кабардар кылуунун жолдору тууралуу баяндама жасады.
Жыйындын катышуучулары глобалдык миграциянын багыттарын, бул жараяндын көмүскө тарабында калган адам аткезчилигин токтотуунун жолдорун талкуулашты.
Чехияда расмий каттоодон 1785 кыргызстандык өткөн. Бейрасмий эсепте алардын саны 5 миңге жакын, анын 400ү студенттер.
Учурда Чехияда Казакстандын 10 миңге жакын, Өзбекстандын 4 миң жараны расмий катталган.
Кыргызстандын миллионго жакын жараны чет өлкөлөрдө миграцияда жүрөт. Соңку жылдары миграциянын багыты Орусиядан Батыш өлкөлөрүнө оой баштады. (GA/AiA)
Шерине