Казакстандын Бириккен Араб Эмираттарындагы (БАЭ) элчисинин мурдагы кеңешчиси Сакен Мамаш аялына зомбулук көрсөткөн деген айып менен камакка алынды. Бул тууралуу “Азаттыктын” казак кызматына Астана шаардык ички иштер башкармалыгынын басма сөз кызматы билдирди.
"Өткөн жылы элчинин экс-кеңешчисине аялын көп убакыт бою ур-токмокко алганы үчүн кылмыш иши козголгон. Ички иштер министрлиги тергөө-ыкчам тобун түзгөн. Окуянын бардык жагдайларын аныктоо үчүн зарыл болгон экспертизалар комплекси жүргүзүлдү. Далилдер да чогултулду" деп айтылат маалыматта.
Тергөөнүн жыйынтыгы менен Сакен Мамаш камакка алынды.
Былтыр май айында Сакен Мамаштын жубайы Карина Мамаштын видеосу "НеМолчи.kz" фондунун социалдык түйүндөрдөгү баракчаларына жарыяланган. Анда ал 10 жылдан бери күйөөсүнүн ур-токмогуна, сексуалдык, экономикалык, эмоционалдык зомбулугуна кабылып келатканын айткан. Келин мамлекеттен жардам сурап, "Мен кооптуу абалдамын, балдарым да коркунучта" деп билдирген.
Келиндин бети-башы көк ала болгон сүрөттөрү жарыяланган.
Окуя резонанс жаратып, Сакен Мамаш Казакстанга чукул чакыртылганын, укук тартибин коргоо органдары териштирүү жүргүзүп жатканын, ал кызматынан бошотуларын коңшу өлкөнүн Тышкы иштер министрлиги билдирген.
Былтыр Казакстанда мурдагы министр Куандык Бишимбаевди Астананын район аралык кылмыш соту Салтанат Нукенованы "өзгөчө мыкаачылык менен уруп-сабап, кыйнап өлтүргөн" деп 24 жылга эркинен ажыратып, жаза мөөнөтүн кайтаруусу күчөтүлгөн колонияда өтөөгө жөнөткөн.
Нукенованын өлүмү Казакстанды нес кылып, зордук-зомбулукка каршы жазаны катаалдатууну талап кылган акциялар башталган. Натыйжада аялды жана баланы кордогондордун жазасын катаалдатуу мыйзамы кабыл алынган. (AiA)
Шерине