Бишкекте бүгүн 4-апрелде кезектеги Франкофония жумалыгы башталууда. Бул тууралуу Швейцариянын Кыргызстандагы элчилиги билдирди.
Элчиликтин маалыматына караганда, иш-чара 12-апрелде жыйынтыкталат.
Жумалыкты "Бишкектеги Француз Альянсы" Франциянын, Швейцариянын, Белгиянын, Канаданын жана Марокконун элчиликтери, Европа Биримдигинин өкүлчүлүгү менен чогуу уюштурууда.
Программа билим берүү, оюн-зоок, маданий багыттагы 30дай иш-чараны камтыйт. Быйылкы фестиваль "Француз тили – дүйнөгө ачылган терезе" деген аталыш менен өтөт.
Фестиваль А.Жумакматов атындагы Мамлекеттик академиялык чоң симфониялык оркестрдин башкы дирижер Рахатбек Осмоналиев жетектеген концертинен башталат. М.Абдраев атындагы Республикалык атайын музыкалык орто мектепте балдар үчүн француз музыкасынын концерти болот.
"Добулбас ур" аттуу швейцариялык комедия көрсөтүлөт. Франциялык, белгиялык жана канадалык режиссерлордун тасмалары да тартууланат.
Улуттук тарых музейинде Гордана Файдын Лувр жөнүндө конференциясы өтөт.
Фестивалдын программасында ошондой эле балдар үчүн спектаклдер, рэгби боюнча спорттук мелдеш, көргөзмөлөр, конкурстар жана башка иш-чаралар бар.
Франкофония жумалыгы жыл сайын жаз айларында француз тилинин жана француз тилдүү өлкөлөрдүн маданиятын бүт дүйнө жүзүндө майрамдоо үчүн уюштурулат.
Француз тилинде сүйлөгөндөрдүн саны дүйнөдө бешинчи орунда турат, ал иш кагаздарын жүргүзүүдөгү үчүнчү тил, беш континенттеги 300 миллиондон ашуун киши французча сүйлөйт жана ал дипломатиянын тили болуп саналат. Эл аралык Франкофония уюмуна 88 өлкө кирет. (RK)
Шерине