Кыргызстандын президенти Садыр Жапаров Самаркандда 3-апрелде Еврокеңештин төрагасы Антониу Кошта жана Еврокомиссиянын президенти Урсула фон дер Ляйен менен жолугушту.
Жапаровдун маалымат кызматы тараткан билдирүүгө ылайык, жолугушууларда соода-экономикалык жана инвестициялык кызматташтыкты тереңдетүү маселелери боюнча пикир алмашылып, гидроэнергетика жана транспорттук каттамдар жаатындагы долбоорлорду биргелешип ишке ашыруунун келечеги талкууланды.
”2024-жылы Кыргызстандын Евробиримдик менен соода жүгүртүүсү өстү. Биз келечекте эки жактуу сооданын көлөмүн мындан да көбөйтүүгө, ошондой эле Европа өлкөлөрүнө таза, нукура өндүрүмдөрдү жана сейрек кездешүүчү металлдарды экспорттоого умтулабыз“, - деп белгиледи Садыр Жапаров.
Еврокеңештин төрагасы Кошта Кыргызстан менен Тажикстандын ортосундагы чек ара маселесинин чечилишин кубаттады. Ал акыркы жылдары Кыргызстан аймактык кызматташтыкты чыңдоодо олуттуу ийгиликтерди көрсөтүп жатканын өзгөчө белгилеп өттү.
Өз кезегинде Европа комиссиясынын президенти Урсула фон дер Ляйен аймактык коопсуздукту чыңдоо экономикалык гүлдөп-өсүүнүн жана туруктуу өнүгүүнүн маанилүү шарты экенин белгиледи.
Жолугушуулар Самаркандда алгачкы Борбор Азия-Евробиримдик саммитинин алкагында өттү.
Саммиттин алдында укук коргоочулар Евробиримдиктин лидерлерин аймактагы адам укуктарынын абалына көңүл бурууга чакырышкан.
Шерине