4-апрелде Европанын тышкы иштер министрлери Орусияны Украинадагы ок атышууну токтотуу боюнча сүйлөшүүлөрдү үзгүлтүккө учуратты деп айыптап, Москвага басым көрсөтүүгө чакырды. Бул тууралуу Reuters агенттиги жазды.
Франциянын тышкы иштер министри Жан-Ноэл Барро Москва ортомчулук кылып, ок атышпоо келишимин сунуштоо менен "көп аракет көргөн" АКШга "жооп бериши керек" деп эсептейт.
Британиянын тышкы иштер министри Дэвид Лэмминин айтымында, Орусиянын президенти Владимир Путин "убакытты созууну" улантууда.
"Ал азыр ок атышууну токтотууга макул болуунун ордуна Украинага, анын карапайым элине, энергетикалык запастарына чабуулдарын улантууда", - деди Лэмми.
Ал эми Германиянын тышкы иштер министри Анналена Бербок Путиндин сүйлөшүүлөр тууралуу сөздөрү "куру убада гана болгонун" белгиледи.
3-апрелде АКШнын Мамлекеттик департаментинин жогорку кызматтагы расмий өкүлү жыйындын биринчи күнүндө "Украинаны колдоого жана согушту токтотууга чакырган пикирлер басымдуу болгонун, президент Трамптын согушту токтотуу аракеттери жана Орусия мунун алкаганда бир топ аракет көрүшү керектигин моюнга алуу" болгонун айтты.
3-4-апрелде Брюсселде НАТОго мүчө өлкөлөрдүн тышкы иштер министрлеринин жыйыны өтүп жатат. Алар бул жолу АКШ Европа мамлекеттерине коргонууга көбүрөөк каражат жумшоого басым кылып жатышын эске алуу менен альянстын коргонуу мүмкүнчүлүктөрүн чыңдоо маселесин талкуулап жатат.
Учурда Украинанын НАТОго мүчө болушу тууралуу маселе күн тартибинде жок болсо да көпчүлүк европалык өнөктөштөр Кошмо Штаттардын курал-жабдыгынын Украинага жеткирилиши боюнча кепилдик алууга аракет кылууда. (AiA)
Шерине