Кыргызстандын футбол боюнча улуттук курама командасы Эл аралык футбол федерациясынын (ФИФА) кезектеги рейтингинде төрт позицияга көтөрүлүп, 1205 упай менен 210 кураманын ичинен 103-орунду алды.
3-апрелде жарыяланган рейтингдин көч башында Аргентина, Франция жана Испания турат. Борбор Азия өлкөлөрүнөн Өзбекстандын курамасы 57-орунга, Тажикстан 104-орунга илинди. Казакстан 113-орунга жазылып, дагы үч тепкичке артке кетти.
Кыргызстандын футбол боюнча улуттук курама командасы 25-мартта Дүйнө чемпионатынын тандап алуу оюндарынын 3-айлампасынын алкагында Катардын курамасы менен беттешип, 3:1 эсебинде уткан.
Кыргызстан футбол боюнча Дүйнө чемпионатынын тандоо оюндарында Азия чөлкөмүнөн 3-айлампага чыгып, Иран, Катар, Өзбекстан, Бириккен Араб Эмираттары жана Түндүк Корея менен А тайпасында таймашып жатат.
Иран курамасы А тайпасында буга чейинки алты беттеште утуп, Өзбекстан менен тең чыккан. Азыр 19 упайы менен тайпанын сап башында келатат. Экинчи орунда 16 упай топтогон Өзбекстан турат. Кыргызстан алты упай менен 5-сапта. Кыргыз футболчулары алты оюнда утулуп, эки оюнда жеңишке жетти.
2026-жылы АКШда, Мексикада жана Канадада өтө турган Дүйнө чемпионатына биринчи жолу 48 курама команда катышат. Бул жолу Азия чөлкөмүнөн Дүйнө чемпионатына катышууга сегиз командага мүмкүнчүлүк берилген.
3-айлампадагы тандоо оюндарына Азия чөлкөмүнөн 18 курама тандалып, алтыдан үч тайпага бөлүнгөн. Оюндар ар бир өлкөнүн өзүндө же атаандаш команданын мекенинде өтүп, тайпада биринчи жана экинчи орунду ээлеген командалар түз эле Дүйнө чемпионатына жолдомо алат. Ал эми үчүнчү жана төртүнчү орунду ээлеген алты команда төртүнчү баскычта ич ара эки тайпага бөлүнүп ойноп, уткан эки команда чемпионатка жолдомону камсыздайт.
5-сентябрда башталган 3-айлампадагы тандоо оюндары 2025-жылдын июнь айында аяктайт. 4-5-айлампадагы тандоо оюндары 2025-жылдын ноябрь айына чейин созулат. (BTo)
Шерине