Улуттук коопсуздук боюнча мамлекеттик комитет (УКМК) Нарын мамлекеттик университетинде 300дөн ашуун чет өлкөлүк студент окуудан чыгарылып, 13 кызматкер дисциплинардык жазага тартылганын жана окуу жайдын айрым жетекчилерин кызматтан алуу сунушу берилгенин билдирди.
Атайын кызматтын маалыматына ылайык, Сатыбалды Нааматов атындагы Нарын мамлекеттик университетинен жетекчилиги билим берүү тармагындагы мыйзамдарды бузуп 400дөн ашуун чет өлкөлүк студентти башка жогорку окуу жайлардан которуу жолу менен кабыл алышканы аныкталган.
“Окуу жайдын жетекчилиги тарабынан окуу жайдын компетентсиз кызматкерлерин атайылап кабыл алуу комиссиясынын курамына киргизип, аларга басым көрсөтүү жолу менен комиссиянын жасалма иштерин уюштуруп, айрым чет элдик студенттерди жасалма документтер менен НМУга өтүшүнө жол бергени такталган”, - деп айтылат маалыматта.
Окуп жаткан чет өлкөлүк студенттердин көпчүлүгүнүн мамлекеттик жана расмий тилдерди такыр билбегенине карабай, сессияда аларга жогорку баалар коюлганы такталган.
Бул окуя тууралуу Нарын мамлекеттик университети, Билим берүү жана илим министрлиги комментарий бере элек.
УКМК март айынын аягында эле Бишкектеги Исхак Раззаков атындагы Кыргыз мамлекеттик техникалык университетинде коррупциялык схема аныкталып, 153 студент окуудан чыгарылганын кабарлаган. Андан тышкары эки окутуучу кызматтан алынып, 14 окутуучу жана жооптуу кызматкер тартиптик жазага тартылган.
УКМКнын төрагасы Камчыбек Ташиев 27-февралда Жогорку Кеңештин жыйынында бардык жогорку окуу жайларда текшерүү жүрүп жатканын, “университеттерде окууга такыр барбаган студенттер диплом алып жатканын, сабакка келген студенттер гана калсын” деген талап коюп жатышканын билдирген.
Ачык булактардагы маалыматтарга караганда, Кыргызстанда 80ден ашык жогорку окуу жайы бар. Алардын ичинен 31и мамлекеттик, эки жогорку окуу жайдын эл аралык деген макамга ээ. (BTo)
Шерине