Франция Украинага Mirage 2000 бомбалоочу учактарынын биринчи партиясын жөнөттү. Бул тууралу Франциянын коргоо министри Себастьян Лекорню X социалдык түйүнү аркылуу билдирди. Анын айтымында, биринчи учак Киевге жеткирилди.
"Эми ал украин учкучтары менен бирге Украинанын коопсуздугун камсыздайт. Учкучтар бир нече ай Францияда даярдыктан өтүштү", - деген Лекорню канча учак берилгенин тактаган жок.
Буга чейин Avions Legendaires Франция Украинага жалпы 20дай бомбалоочу учак берерин жазган.
2024-жылдын июнь айында Франциянын президенти Эммануэл Макрон жарыялагандай, Париж жыл соңуна чейин Mirage 2000 учактарын жөнөтүп, учкучтарды даярдоо милдетин өзүнө алмак.
Былтыр октябрда тышкы иштер министри Жан-Ноэль Барро учактар Украинага 2025-жылдын башында жеткирилерин убада кылган.
Себастьян Лекорню билдиргендей, учактар жаңы техника менен жабдылган, анын ичинде "аба-жер" классындагы ракеталар жана радиоэлектрондук чабуулдан коргоо жабдыктары да бар.
Mirage 2000 – төртүнчү муундагы француздардын бир мотордуу реактивдүү бомбалоочу учагы. Аны Dassault компаниясы чыгарат. Украинага берилген Mirage 2000−5F деген түрү SCALP-EG жана Storm Shadow ракеталары менен аткылоого жөндөмдүү.
Былтыр Париж Киевге эки миллиарддан ашуун еврого аскердик жардам көрсөткөн.
Шерине