Өзбекстан Түркиянын аэрокосмостук TUSAS компаниясы чыгарган ANKA SIHA учкучсуз аппараттарын сатып алуу боюнча макулдашууга кол койду. Бул тууралуу коргонуу өндүрүшүнө жана авиацияга адистешкен SavunmaSanayiST порталы жазды. Маалыматка караганда, дрондор Ташкентке жакын арада жеткириле баштайт.
Макулдашуунун чоо-жайы, анын ичинде дрондордун саны жана алардын баасы ачыктала элек. ANKA аскердик дрондорун Түркиянын куралдуу күчтөрү, Алжир, Казакстан, Тунис, Малайзия, Индонезия жана Чаддын армиясы колдонору белгилүү.
TUSAS компаниясы чыгарган AKSUNGUR дрону эки мотордон турат, абада 50 сааттай кармалып тура алат жана 750 кг чейинки салмактагы жүктөрдү көтөрөт.
Ал эми ANKA SIHA учкучсуз аппараты бир моторлуу, абада 30 сааттай жүрө алат жана 350 кг чейинки салмактагы жүк көтөрө алат.
2023-жылдын ноябрь айында Өзбекстандын президенти Шавкат Мирзиёев Сурхандарыядагы аскердик бөлүккө барып, түрктөрдүн BAYRAKTAR TB2 дронунун учурулушуна күбө болуп келген.
Былтыр жайында Анкарага барганда Мирзиёев Kaan деп аталган заманбап бомбалоочу учактарды көргөн. Кийин Ташкентте Түркиянын коргоо министри Яшар Гүлер башында турган делегацияны кабыл алган.
Шерине