Бишкек шаарынын мэри Айбек Жунушалиев 20-декабрда жолду кардан тазалоо ишин жетиштүү жүргүзбөгөнү үчүн бир катар жетекчилерге тартиптик жаза берди. 21-декабрда мэриянын басма сөз кызматы билдиргендей, мэрдин орун басары Рамиз Алиевге, Октябрь районунун акими Жаныбек Орозалиевге, "Тазалык" муниципалдык ишканасынын директору Жолдош Чуштуковго, Октябрь районунун участогунун башчысына чара көрүлгөн.
Жунушалиев карды тазалоо иштери шаардын Октябрь районунда чабал жүргөнүн белгилеп, жумушту ыкчам жүргүзүү үчүн башка коммуналдык кызматтардын базасына атайын техникаларды бөлүштүрүүнү тапшырды.
“Быйыл биринчи жолу атайын техникаларды алууга 1 млрд сом бөлүнгөн, бүгүнкү күндө олуттуу сандагы техникалар келип, кызматкерлер үчүн бардык шарттар түзүлүүдө. Демек, тейлөө жакшы натыйжаларды жана турак жай-коммуналдык чарба тармагында сезилерлик өзгөрүүлөрдү көрсөтүшү керек”, - деди Жунушалиев.
Мэриянын берген маалыматына караганда, 20-декабрда шаардагы көчөлөрдү жана тротуарларды кардан тазалоого "Тазалык" муниципалдык ишканасынын 700 кызматкери чыкты. Ошондой эле туз сепкен, жол тазалаган, кар жүктөгөн жана башка жумуштарды аткарган жалпы 66 техника тартылган.
20-декабрда Бишкек шаарында кар калың жаап, шаар тургундары жолдор убагында тазаланбай жатканын, мындан улам жолдо тыгын пайда болгонун социалдык тармактарга жазышкан. Бишкектеги жол тыгынын көрсөткөн онлайн платформаларда тыгындын көрсөткүчү эң жогорку чекке жеткени белгилүү болду.
Шерине