Жогорку Кеңештеги “Ата-Журт Кыргызстан” фракциясынын депутаты Чынберди Төлөнов мандатын тапшыруу боюнча Борбордук шайлоо комиссиясына (БШК) арыз жазып, Боршайком 16-декабрда депутаттын ыйгарым укуктарын мөөнөтүнөн мурда токтотту.
Анын мандаты “Ата-Журт Кыргызстан” партиясынан депутаттыкка талапкерлердин тизмесинде кийинки турган Жайлообай Нышановго берилди.
Чынберди Төлөнов 2023-жылы ноябрь айында диплом маселесинен улам мандатынан ажыраган депутат Фархат Исмаиловдун ордуна келген.
Ачык булактардагы маалыматтар боюнча, Жайлообай Нышанов 1968-жылы Чаткал районунун Каныш-Кыя айылында туулган. Жусуп Баласагын атындагы Кыргыз улуттук университетинин экономика факультетин аяктаган.
Эмгек жолун 1988-1989-жылдары Каныш-Кыя совхозунда жумушчу болуп иштөөдөн баштап, 1995-жылдан бери жеке ишкерлик менен алектенип келаткан.
Жогорку Кеңештин VII чакырылыштагы депутаттары 2021-жылы 29-декабрда ант берип, ишке киришкен. Жаңы Конституцияга ылайык, парламентке бир мандаттуу округдардан 36 депутат, партиялык тизме менен 54 эл өкүлү шайланган. Андан бери ар кандай жагдайда 20 чакты депутат мандатын тапшырды. (BTo)
Шерине