Франциянын президенти Эммануэл Макрон борборчул "Демократиялык кыймыл" партиясынын лидери, өзүнүн тарапташы Франсуа Байруну өкмөт башчылыкка дайындады.
4-декабрда Франциянын парламенти буга чейинки премьер-министр Мишель Барньеге ишенбестик көрсөткөн. Ал бул кызматта болгону үч ай отурду. Муну менен депутаттар 1962-жылдан бери биринчи жолу өкмөттү таркатышты.
Барньенин кызматтан кетишине анын депутаттардын макулдугу жок 2025-жылга карата социалдык камсыздандыруу боюнча бюжетти кабыл алышы түрткү болду. Ал документке ылайык, бюжет 40 миллиард еврого кыскартылып, салыктар жалпы 20 миллиард долларга көбөйтүлмөк.
Азырынча жаңы премьер-министрди депутаттар канчалык колдору белгисиз. Француз басылмалары өкмөт башчыга солчул жана оңчул фракциялардын ортосунда баланс табуу кыйын болорун жазышты.
Жаңы өкмөт башчы Байру буга чейин 1993-1997-жылдары билим берүү министри, 2017-жылы Юстиция министри болгон. Соңку кызматында бир ай отургандан кийин эле баш тарткан.
Ал үч жолу өз талапкерлигин президенттик шайлоого койгон. 73 жаштагы Байрунун аялы, алты баласы, 12 небереси бар.
Шерине