Кошмо Штаттар Грузиядагы демократияга бүлүк салууга жоопкер дагы 20 адамга санкция салды. Бул тууралуу АКШ Мамдепартаменти билдирди.
“Кара тизмеге” бир катар министрлер, парламент депутаттары, тартип коргоо органдарынын жана коопсуздук кызматтарынын өкүлдөрү кирди. Алардын аты-жөнү азырынча белгисиз. Бул тизме дагы кеңейиши мүмкүн экени кабарланды.
"Кошмо Штаттар “Грузин кыялы” партиясынын Грузия жарандарына, анын ичинде демонстранттарга, маалымат каражаттарынын өкүлдөрүнө, укук коргоочуларга жана оппозициячыл ишмерлерге карата улантып жаткан эч бир актоого болбой турган зомбулугун кескин айыптайт”, - деп жазылат Мамдепартамент тараткан билдирүүдө.
Грузияда жапырт нааразылык акциялары ноябрдын соңунда башталган. Анын тутанышына өкмөт башчы Ираклий Кобахидзенин Евробиримдикке кошулуу тууралуу сүйлөшүүлөрдү 2028-жылга чейин токтоткону тууралуу билдирүүсү түрткү болду. Ошондон бери демонстрациялар баш калаа Тблисиде жана башка шаарларда ар түнү уланууда. Жалпы нааразылык акцияларында 400дөй киши кармалып, алардын 30дайына кылмыш иши козголду.
Буга чейин Кошмо Штаттар Грузия менен стратегиялык өнөктөштүгүн токтотуп, "Грузин кыялы" партиясынын жүздөй өкүлүнө жана тартип коргоо органдарынын кызматкерлерине санкция салган. Анда Вашингтон мындай кадамга Грузияда "чет элдик агенттер" тууралуу мыйзамдын кабыл алынышына жана ага каршы башталган демонстрацияларды күч менен таркатууга байланыштуу барган.
"Грузин кыялы" партиясынын өкүлдөрү Дональд Трамп кызматка киришери менен эки өлкө ортосундагы алакалар оңолоруна үмүттөнүп турушат.
Шерине