Азербайжанда сот саясий баяндамачы Назакат Мамедованы 13 жылга эркинен ажыратты. "Азаттык" радиосунун азери кызматынын маалыматына караганда, Баку сотунда кабыл алынган мындай өкүм ага каршы коюлган "Орусиянын пайдасына тыңчылык" деген айыптын негизинде чыкты.
Мамедова комментатор журналист катары жалпыга маалымдоо каражаттарына, YouTube порталындагы Alfa TV каналына чыгып жүрчү. Бир жыл мурда аны камап коюшкан, өкүмү 5-ноябрда жарыяланды.
Азербайжандын Мамлекеттик коопсуздук кызматы аны "Журналисттик ыйгарым укуктарын Орусиянын атайын кызматы менен кызматташуу үчүн колдонгон" деп айыптаган. Азери бийлиги Мамедованын YouTube каналы "ачыктан-ачык орусиялык материалдарды жана интервьюларды" көрсөткөн, бул үчүн ал Москвага байма-бай каттап, ошол жактан акча алып жүргөн жана орусиялык тыңчылар менен жашыруун жолугушууларды өткөрүп турган" деп эсептейт.
Мамедова өзү мындай айыптоолордун баарын четке кагып, Орусияга конференцияларга катышуу үчүн барганын, акча жол кире, сапар чыгымын жабууга берилгенин айтууда.
Соңку жылдары Азербайжанда бир нече журналист кармалып, түрмөгө отургузулду. Журналисттерди коргоо комитети медиа өкүлдөрүнө козголгон иштерди "жасалма" жана "саясатташкан" деп атоодо. (RK)
Шерине