Орусияда «Весна» жаштар кыймылынан эки мүчөсүн камоого ордер берилгенин бүгүн 22-июлда "Медиазона” басылмасына таянып “Свобода” радиосу жазды. Аларга “экстремисттик топ түзгөн, орус аскерлери жөнүндө жалган маалымат тараткан, өкмөткө каршы чакырык жасаган, аскердик атак-даңкты сыйлабагандык” деген айыптар тагылып жатканы маалымдалды.
Лев Гяммер жана Глеб Кондратьев экөө тең Орусиядан чыгып кеткен.
Гяммер мурда оппозиция лидери, маркум Алексей Навальныйдын командасынын өлкөнүн түштүк-батышындагы Краснодар шаарындагы бөлүмүн жетектеп турган.
“Весна” 2022-жылы декабрда Кремлдин Украинага каршы согушуна мобилизацияга каршы митингдерди уюштургандан кийин Орусияда экстремисттик деп табылып, анын ишмердүүлүгүнө тыюу салынган. (RK)
