Бишкекте Ички иштер министрлигинин Ички аскерлеринде кызмат өтөп жаткан жоокердин өлүмү иликтене баштады. Бул тууралуу «Азаттык» радиосуна мекеменин басма сөз катчысы Азамат Оторбаев билдирди. Анын айтымында, окуя 21-декабрда Бишкектеги №702 аскер бөлүгүндө болгон.
«Болжол менен эртең мененки 5:30 чамасында жоокер асынып калган абалда табылган. Себептери такталып жатат. Бул боюнча Бишкек шаардык Аскер прокуратурасы сотко чейинки териштирүү жүргүзүүдө», - деди ал.
Каза болгон жоокер 22 жашта болчу. Ал аскерге мөөнөттүү кызмат өтөөгө жогорку окуу жайын аяктагандан кийин Бишкектин Свердлов районунан быйыл күзүндө чакырылган. Маркумдун аты-жөнү ачык айтылган жок.
Оторбаевдин айтымында, быйыл февраль айынын башында да ички аскерлерде бир суицид фактысы катталган. Окуя ушул эле №702 аскердик бөлүктө болгон. (RK)
