Ռուսաստանի Ուղղակի ներդրումների հիմնադրամի ղեկավար Կիրիլ Դմիտրիևը նախագահ Պուտինի հանձնարարությամբ երեկվանից Վաշինգտոնում հանդիպումներ է ունենում Թրամփի վարչակազմի հետ: Օրակարգում ռուս - ամերիկյան հարաբերությունների կարգավորումն է և Ուկրաինայի հարցը: Սթենֆորդում ուսանած և ԱՄՆ վարչակազմի հետ սերտ կապեր ունեցող Դմիտրիևը ռուսաստանցի բարձրաստիճան առաջին պաշտոնյան է, որ այցելում է Վաշինգտոն Ուկրաինա Ռուսաստանի ներխուժումից ի վեր:
Դմիտրիևն ասել է, որ երկխոսության վերականգնումը բարդ ու աստիճանական գործընթաց է, սակայն յուրաքանչյուր հանդիպում թույլ է տալիս առաջ գնալ։ Մինչ այդ էլ սոցցանցում գրել է, որ կան բազմաթիվ ուժեր, որ շահագրգռված են պահպանել լարվածությունը. - «Այդ ուժերը միտումնավոր խեղաթյուրում են Ռուսաստանի դիրքորոշումը՝ փորձելով խափանել երկխոսության ցանկացած քայլ՝ չխնայելով ո՛չ գումար, ո՛չ ռեսուրսներ»:
Կրեմլի խոսնակն, իր հերթին, ասել է, որ Ռուսաստանը ցանկանում է շարունակել աշխատել ԱՄՆ-ի հետ ուկրաինական ճգնաժամի խաղաղ կարգավորման համար։ Դմիտրի Պեսկովը նշել է, որ բոլորն էլ նախընտրում են չպատերազմել, այլ խոսել, և խոսելուց բացի նաև լսված լինել։ «Ամերիկյան ներկայիս վարչակազմի հետ մեր գործերը հենց այս վիճակում են», - վստահեցրել է նա:
Դոնալդ Թրամփը, որը վերջին օրերին քննադատում էր Պուտինին և սպառնում նավթի մաքսատուրքերով՝ հրադադարի հարցում ժամանակ ձգելու համար, ասել է, որ Ռուսաստանն ու Ուկրաինան լավ համագործակցություն են ծավալել ԱՄՆ հետ:
«Կարծում եմ՝ լավ համագործակցություն ունենք Ռուսաստանի և Ուկրաինայի հետ ...Պետք է դադարեցնել այս պատերազմը ... Սա անիմաստ պատերազմ է», - հայտարարել է Միացյալ Նահանգների նախագահը:
Այս ֆոնին Բրյուսելում երեկվանից հանդիպում են ՆԱՏՕ-ի անդամ երկրների արտգործնախարարները՝ քննարկելու դաշինքի անվտանգային առաջնահերթությունները, դաշնակիցների պաշտպանական ներդրումների ավելացումն ու Ուկրաինայում կայուն խաղաղության ապահովումը: Նաև խոստացել են այս տարվա առաջին եռամսյակում մոտ 21 մլրդ եվրոյի ռազմական օժանդակություն հատկացնել Ուկրաինային։ Վերջնական որոշումն ակնկալվում է այսօր:
Հանդիպումից առաջ ԱՄՆ պետքարտուղարը հայտարարեց՝ պատերազմն Ուկրաինայում հիշեցում է այն մասին, որ կոշտ ուժը դեռ զսպման անհրաժեշտ միջոց է: Մարկո Ռուբիոն հավաստիացրեց, որ ԱՄՆ-ը հավատարիմ կմնա ՆԱՏՕ-ի շրջանակում իր հանձնառություններին, սակայն դաշինքի անդամ երկրները ևս պետք է իրենց պաշտպանական ծախսերն ավելացնեն:
«Մենք իսկապես ցանկանում ենք այստեղից հեռանալ համոզմունքով, որ գտնվում ենք իրատեսական ուղու վրա, երբ անդամներից յուրաքանչյուրը կպարտավորվի և կկատարի պաշտպանական ծախսերը մինչև 5 տոկոսը հասցնելու խոստումը», - ասաց Ռուբիոն:
Լեհաստանի պաշտպանության նախարարը հայտարարել է, որ Վարշավան ցանկանում է իր պաշտպանական ծախսերն ավելացնել մինչև ՀՆԱ-ի 5 տոկոսը: «Մենք պետք է պատրաստ լինենք ամենադժվար սցենարներին և պետք է բավականաչափ ուժեղ լինենք, որպեսզի կանխենք պատերազմի բռնկումը», - ասել է Վլադիսլավ Կոսինյակ-Կամիշը:
Երեկ էլ Վարշավայում Եվրամիության երկրների պաշտպանության նախարարների ոչ ֆորմալ հանդիպմանը քննարկվել էր Ուկրաինային մինչև 2025-ի վերջ 5 մլրդ եվրո արժողությամբ 2 մլն միավոր մեծ տրամաչափի զինամթերք տրամադրելու հարցը: Եվրամիության դիվանագիտության ղեկավար Կայա Կալլասն ասել է, որ եվրոպական երկրներն արդեն ապահովում են դրա կեսից ավելին:
«Մենք պետք է հնարավորինս արագ օգնություն հասցնենք Ուկրաինային ... Ուրախ եմ տեսնել, որ արդեն ունենք տարբեր առաջարկներ կամ տարբեր երկրներ իրենց ներդրումն են անում», - հայտարարել է Կալլասը:
Մինչ հրադադար հաստատելու ջանքերը դեռ շոշափելի արդյունք չեն տալիս, Ռուսաստանն ու Ուկրաինան շարունակում են ռազմական գործողությունները: Կրիվոյ Ռոգին ռուսական հարվածից զոհվել է 4 մարդ, վիրավորվել՝ 14-ը: Ռուսական զորքը երեկ մի քանի անգամ հարվածել է նաև Պոկրովսկին, կա մեկ զոհ, վեց վիրավոր: Ռուսական կողմն, իր հերթին, հաղորդել է մի քանի շրջաններում ուկրաինական անօդաչուների հարվածների և ևս երկու գյուղ գրավելու մասին: Կողմերը միմյանց մեղադրել են էներգետիկ օբյեկտներին հարվածելու համար:
