Գյումրիի ապագա ավագանիում վճռորոշ ձայներ ստացած «Մեր քաղաքը» դաշինքի առաջնորդ Մարտուն Գրիգորյանը 3-րդ օրն է՝ պահում է ինտրիգը ու չի ասում՝ ի վերջո սատարելո՞ւ է երկրորդ տեղը զբաղեցրած Վարդան Ղուկասյանին: Հայաստանի մեծությամբ երկրորդ քաղաքի ղեկավարի պաշտոնին արդեն 5-րդ անգամ հավակնող Վարդան Ղուկասյանն այսօր «Ազատությանն» ասաց՝ ինքն էլ տեղեկություն չունի:
Առանց «Մեր քաղաքը» դաշինքի ձայների Կոմկուսի ցուցակը գլխավորող Ղուկասյանը քաղաքապետարան վերադառնալ չի կարող, իր և մյուս երկու ընդդիմադիր ուժերի ձայները բավարար չեն:
Իսկ Մարտուն Գրիգորյանը չի շտապում իր երբեմնի ախոյանի ճակատագրում հստակություն մտցնել: Նա կիրակի օրվա արտահերթից հետո հեռախոսազանգերին չի պատասխանում, հանրային վայրերում չի երևում, շտաբն էլ փակ է պահում:
Գյումրիի ընտրությունները երեկ նաև «Քաղաքացիական պայմանագրի» վարչության նիստում են քննարկվել: Իշխող ուժը թեև ամենաշատ ձայնն է ստացել, բայց Կոմկուսի նման միայնակ չի կարող իշխանության գալ Գյումրիում: Հնարավո՞ր է քաղաքապետ ընտրեն ընդդիմադիր Մարտուն Գրիգորյանին. նիստին մասնակցած պատգամավոր Ալխաս Ղազարյանը ուղիղ պատասխան չտվեց այս հարցին. «Ես այս պահին չեմ կարող որևէ բան ասել, որովհետև որոշում էլ չունենք, քննարկում էլ չենք ունեցել: Մենք միանշանակ ունենք մեր 14 մանդատը, սպասելու ենք, տեսնենք՝ ինչ կլինի»:
Օրենքով համայնքի ղեկավարը պետք է ընտրվի ավագանու առաջին նիստում: Եթե քաղաքական ուժերը բոյկոտեն, ու նիստը չկայանա, ու 2 շաբաթվա ընթացքում համայնքի ղեկավար չընտրվի, ապա ավագանին կլուծարվի, ու նոր ընտրություններ կնշանակվեն: Իսկ եթե քվորում ապահովվի, նիստը կկայանա, ապա այն չի ավարտվի, մինչև չընտրվի համայնքի ղեկավար: Եթե առաջադրված թեկնածուներից ոչ մեկը Գյումրիի պարագայում չհավաքի անհրաժեշտ 17 ձայնը, ապա համայնքի ղեկավարի ընտրության 2-րդ փուլ կլինի: Սա, սակայն, նոր ընտրություններ չի նշանակում, ավագանին է շարունակելու համայնքի ղեկավարի ընտրությունը, այս անգամ ընտրությունում առավելագույն ձայներ ստացած թեկնածուները կարող են առաջադրվել՝ ՔՊ-ական Սարիկ Մինասյանն ու Կոմկուսի առաջին համար Վարդան Ղուկասյանը:
Ընտրական փորձագետ Վարդինե Գրիգորյանն «Ազատության» հետ զրույցում ասաց՝ եթե այս դեպքում էլ ոչ մեկը չստանա 17 ձայն, ապա հաղթող կհամարվի ընտրություններում առավելագույն ձայն ստացած թեկնածուն՝ այսինքն՝ ՔՊ-ից Սարիկ Մինասյանը:
«Եթե ի վերջո հավասար են ձայները բաշխվում, այս դեպքում ստանում է համայնքի ղեկավարի պաշտոնը նա, ում կուսակցությունն ընտրություններում առավել շատ ձայներն է ստացել», - նշեց նա:
Ու մինչ «ո՞վ կդառնա Գյումրիի քաղաքապետ» հարցը դեռ պատասխան չունի, երեկ իրավապահները հայտնեցին, որ վարույթ են նախաձեռնել այդ պաշտոնին հավակնող Վարդան Ղուկասյանին վերագրվող մի ձայնագրության առնչությամբ, որը իշխանական լրատվամիջոցները տարածեցին նախընտրական քարոզարշավի վերջին օրերին: Ձայնագրությունում ենթադրաբար Վարդան Ղուկասյանը խոսում էր Գյումրիի շուկաներից մեկի աշխատակիցների հետ հանդիպում կազմակերպելու մասին, սպառնալիքներ ու կոպիտ հայհոյանքներ հնչեցնում:
Ղուկասյանն այսօր չցանկացավ խոսել քրեական նոր վարույթից, իսկ ավելի վաղ ուղիղ չէր հերքել, թե ինքը չէ խոսողը:
«Արհեստական բանականություն եք ասում, ինչ եք ասում, դե էդպես էլ հասկացեք էլի: Թող հետաքրքրվեն, վերջում արհեստական բանականությունը ջրի երես դուրս կգա», - ասել էր նա:
Վարույթը հարուցվել է հավաքին մասնակցելուն հարկադրելու, ինչպես նաև հավաքին մասնակցելու նպատակով նյութապես շահագրգռելու հոդվածով: Դրանով նախատեսվում է տուգանքից մինչև 3 տարվա ազատազրկում, ինչպես նաև որոշակի պաշտոններ զբաղեցնելու արգելք: Քննչական կոմիտեն չի ասում՝ վարույթի հարուցմանը ինչ է հետևելու, կգնա՞ն Վարդան Ղուկասյանին ձերբակալելու, թե՞ ոչ: Արդեն իսկ մի քանի քրեական գործով անցնող Ղուկասյանը ընտրությունների հաջորդ օրը չէր բացառել իր ձերբակալությունը:
