Վարչական ռեսուրսի չարաշահում, ընտրակաշառք, վիճաբանություն, կուտակումներ ընտրատեղամասերում, դիտորդի գործունեության խոչընդոտում, քվեարկության գաղտնիության խախտում, ուղղորդված քվեարկություն. սրանք այն հիմնական խախտումներն են, որ նախընտրական շրջանում ու քվեարկության օրը Փարաքարում ու Գյումրիում նկատել են դիտորդություն իրականացնող երկու կազմակերպությունները՝ «Անկախ դիտորդն» ու «Ականատեսը»:
«Ականատեսը» եզրակացրել է՝ թե՛ քարոզարշավը, թե՛ ընտրությունները եղել են մրցակցային, բայց անցել են լարված մթնոլորտում, իսկ տեղ գտած խախտումները վերջնական արդյունքների վրա չեն ազդել:
«Հիմնական գործընթացներն ընթացել են խաղաղ, լարված մթնոլորտում, սակայն օրենքով սահմանված ընթացակարգերի համաձայն, և այնպիսի խախտումներ չեն գրանցվել, որոնք կարող էին էական, մեծ ազդեցություն ունենալ ընտրությունների արդյունքների վրա», - ասաց Լևոն Չուկակլյանը:
«Անկախ դիտորդ» առաքելության անդամ Դանիել Իոաննիսյանն ընդգծեց՝ թե՛ Փարաքարում, թե՛ Գյումրիում ընտրությունների արդյունքներն արտահայտում են ընտրողների կամքը, սակայն Գյումրիում իրենք այդ կամքի վրա ազդեցության փորձեր են նկատել:
«Ընտրողների վրա ապօրինի ազդեցության դեպքերը քվեարկության օրվան նախորդած փուլում Գյումրիում եղել են պարբերական բնույթի, և դրանց ազդեցությունը ընտրողների կամքի ձևավորման վրա, ըստ էության, հաշվել հնարավոր չէ», - նշեց նա:
«Անկախ դիտորդն» ընդհանուր առմամբ 5 հաղորդում է ներկայացրել հանցագործության մասին, 3-ը՝ նախընտրական փուլում, երկուսը՝ քվեարկության: Նախընտրական փուլում տրված հաղորդումները վերաբերել են քաղաքապետի թեկնածուներ Վարդան Ղուկասյանին, Մարտուն Գրիգորյանին և Սարիկ Մինասյանին:
Դիտորդների ուշադրությունից չեն վրիպել ձայնագրության մեջ ենթադրաբար Վարդան Ղուկասյանի հնչող հրահանգները՝ իր օգտին քվեարկելու մասին, Մարտուն Գրիգորյանի անունից արված բարեգործությունը խճապատման տեսքով և Սարիկ Մինասյանի կողմից բարեգործության արգելքի հնարավոր խախտումն ու դիրքի հնարավոր չարաշահումը:
Երկու հաղորդում էլ ընտրության օրը տեղի ունեցած դեպքերի վերաբերյալ են ներկայացրել: Խոսքը քվեարկության գաղտնիության խախտմանն ու իրենց դիտորդի գործունեությանը խոչընդոտելուն է վերաբերում:
Եվս մի ուշագրավ դեպք են դիտորդները հայտնաբերել, որ իշխող «Քաղաքացիական պայմանագիրը» ենթադրաբար վարչական ռեսուրս է չարաշահել ու անձնական տվյալների պաշտպանության առումով է խախտում թույլ տվել: Այդ մասին դիտորդներին ահազանգել է երեք հոգի, բայց ենթադրաբար խոսքը կարող է ավելի քան 200 հոգու վերաբերել: Դիտորդները դիմել են անձնական տվյալների պաշտպանության գործակալություն:
«Գյումրու համայնքապետարան դիմած քաղաքացիները, որոնք դիմել էին, որ քաղաքապետի հետ ընդունելություն ունենան, այդ քաղաքացիների անձնական տվյալները փոխանցվել են ՔՊ շտաբ, որտեղից այդ մարդկանց զանգել և կանչել են արդեն քարոզչական հանդիպմանը», - ասաց Դանիել Իոաննիսյանը:
Ինչ վերաբերում ընտրակաշառքի և բարեգործության արգելքի խախտումների դեպքերով Հակակոռուպցիոն կոմիտեի ձերբակալություններին, ապա Դանիել Իոաննիսյանն ասում է՝ կարևոր էր, որ որևէ մեկի դեպքում այնպիսի փախանման միջոց չի կիրառվել, որ կարգելակեր այդ մարդկանց մասնակցությունը քարոզարշավին:
«Երեկ ձերբակալված անձանց մասով քաղաքական դերակատարներից մեկը, որ ուժից ձերբակալվածներն էին, հայտարարեց, որ մենք ընտրողների հետ կազմակերպչական աշխատանք էինք անում, և Հակակոռուպցիոն կոմիտեն մեզ խանգարեց: Կներեք, ես Ընտրական օրենսգրքում չգիտեմ որևիցե գործառույթ, որը կուսակցությունը ընտրողների հետ պետք է անի ընտրության օրը: Սա, իմ կարծիքով, ինչ-որ առումով ինքնախոստովանություն է», - նշեց նա:
Դիտորդները նախընտրական քարոզարշավի ժամանակ էլ են բազմաթիվ խախտումներ նկատել, օրինակ՝ որ քարոզարշավ կամ հակաքարոզ են իրականացրել մարդիկ, որ դրա իրավունքը չունեին՝ մի դեպքում Շիրակի հոգևոր առաջնորդը, մյուս դեպքում՝ Ռուսաստանի Պետական դումայի պատգամավորը հօգուտ ընդդիմության թեկնածուների: Իսկ իշխանական թեկնածուի օգտին «Ականատես» դիտորդական առաքելությունն առանձնացրել է ենթադրաբար կեղծ հարցումները, Հանրայինի անհամաչափ լուսաբանումն ու վարչական ռեսուրսի կենտրոնացումը:
Մանրամասները՝ «Ազատության» ռեպորտաժում.
