«Մեր քաղաքը» դաշինքը գլխավորող Մարտուն Գրիգորյանը դեռ չի արձագանքել Գյումրիի քաղաքապետի թեկնածու Վարդան Ղուկասյանին, որը երեկ ֆեյսբուքյան գրառմամբ դիմել էր Գրիգորյանին՝ իրեն աջակցելու հարցում նրանից հստակություն ակնկալելով:
«Որպեսզի Գյումրին ունենա ընդդիմադիր քաղաքապետ, Մարտուն Գրիգորյանը պետք է հետևի Ռուբեն Մխիթարյանի ու Կարեն Սիմոնյանի օրինակին և հստակ հայտարարի, որ կքվեարկի ամենաշատ ընդդիմադիր քվե ստացած թեկնածուին», - գրել էր Ղուկասյանը:
Ընտրություններում երկրորդ տեղը զբաղեցած Ղուկասյանն այսօր «Ազատությանը» փոխանցեց, որ Մարտուն Գրիգորյանից դեռ տեղեկություն չունի, սպասում է: Իսկ վերջինս առայժմ լուռ է, նրա շտաբն այսօր էլ երեկվա նման փակ էր: Նախնական արդյունքներով վճռորոշ վեց մանդատ ունեցեղ «Մեր քաղաքը» դաշինքի առաջնորդը նաև հեռախոսազանգերին չի պատասխանում: Հետընտրական ողջ օրվա լռությունը երեկ նա խախտեց ֆեյսբուքյան միայն մեկ կարճ գրառմամբ, թե «ՔՊ-ն Գյումրիում քաղաքապետ չի ունենալու՝ դա հաստատ է»: Բայց թե ինչ սցենարով է պատրասվում իր այս հայտարարությունն իրականություն դարձնել, չբացատրեց:
Որոշ տեղեկությունների համաձայն՝ Գրիգորյանն այսօր պատրաստվում է հայտարարություն անել։ Այդ մասին ակնարկ կա նաև նրա թիմակիցներից «Պատիվ ունեմ» խմբակցության պատգամավոր Հայկ Մամիջանյանի գրառման մեջ։
«Վաղը սպասելու եմ Մարտուն Գրիգորյանին թիրախավորողների զղջացող գրառումներին: Այս անիմաստ աղմուկից մի օգուտ եղավ՝ մի խումբ փողով գործիՔներ և գործիՉներ այսօրվա իրենց հացն էլ վաստակեցին ՀՀԿ-ի մասին ստեր ու դավադրապաշտական զառանցանքներ տարածելով», - գրել է Մամիջանյանը:
Այն, որ Գրիգորյանն ի վերջո սատարելու է Ղուկասյանին, ակնարկում է նաև վարչապետի գյումրեցի խոսնակ, «Քաղաքացիական պայմանագրի» քաղաքապետի թեկնածուի օգտին ակտիվորեն քարոզած Նազելի Բաղադասարյանը. «Ընդդիմադիր ճամբարների կողմից ժողովրդի արժանահավատությունը չարաշահելու և մոլորեցնելու միջոցով կորզվել են քվեներ, որոնք այսօր նվիրվելու են մեզնից կրկնակի նվազ ձայներ հավաքած Կոմկուսի ներկայացուցչին»:
Նախնական արդյունքներով՝ իշխող «Քաղաքացիական պայմանագիրը» Գյումրիում 14 մանդատ կստանա, Վարդան Ղուկասյանի գլխավորած Կոմկուսը՝ 8, «Մեր քաղաքը» դաշինքը՝ 6, «Իմ հզոր համայնքը»՝ 3 և «Մայր Հայաստանը»՝ 2: Վերջին երկուսը երեկ արդեն հայտնել են, որ կսատարեն Ղուկասյանին: Ավագանու առաջին նիստում Ղուկասյանին քաղաքապետ ընտրվելու համար առնվազն 17 ձայն է պետք, սա նշանակում է, որ Մարտուն Գրիգորյանի ուժից Վարդան Ղուկասյանին առնվազն 4 կողմ ձայն է պետք լինելու:
Գյումրիի ընտրություններում ամենաշատը՝ 36 տոկոս քվե ստացած իշխանական ուժը ևս չի պատրաստվում նահանջել: Կուսակցության վարչության անդամ Արսեն Թորոսյանն «Ազատության»-ն ասել էր, թե իրենց քաղաքական ուժն ավագանու անդրանիկ նիստում Սարիկ Մինասյանին համայնքապետի թեկնածու կառաջադրի:
«Սարիկ Մինասյանը ստացել է ամենաշատ ձայները, և չառաջադրելը նույնիսկ կարող է սխալ լինել, եթե նույնիսկ գիտենք, որ չի ընտրվելու, բայց դրա մասին վաղ է խոսելը։ Մենք համարում ենք, որ մեզ տրված յուրաքանչյուր քվե կարևոր է, և պայքարելու ենք այդ յուրաքանչյուր քվեի համար, տեր ենք լինելու դրանց։ Եթե ստացվի այնպես, որ օրենքով սահմանված կարգով համայնքապետ պետք է ընտրվի, ու այդ ընտրությունների ժամանակ մենք չկարողանանք ընտրվել, ապա մենք դրանից ապոկալիպսիս չենք սարքելու և շարունակելու ենք մեր աշխատանքը», - ասել է Թորոսյանը։
Եթե ընդդիմության միավորվի, ու Վարդան Ղուկասյանը քաղաքապետ ընտրվի, Հայաստանի իշխող ուժը երկրի մեծությամբ երկրորդ քաղաքում ընդդիմություն կդառնա:
