Գյումրիի արտահերթում 15,8 տոկոս ստացած «Մեր քաղաքը» ընդդիմադիր դաշինքի ցուցակը գլխավորող Մարտուն Գրիգորյանն առայժմ չի խախտել լռությունն ու չի պատասխանել գլխավոր հարցին՝ պատրա՞ստ է միանալ ընտրություններում երկրորդ տեղը զբաղեցրած Կոմկուսի թեկնածու Վարդան Ղուկասյանին:
Անցողիկ շեմը հաղթահարած մյուս երկու ընդդիմադիր ուժերը՝ 6.2 տոկոս ստացած «Մայր Հայաստանն» ու 7,9 տոկոս ստացած «Իմ հզոր համայնքն» արդեն հայտարարել են, որ կսատարեն Գյումրիի նախկին քաղաքապետ Ղուկասյանին:
Մարտուն Գրիգորյանն ու նրա թիմակիցներն առավոտից զանգերին չեն պատասխանում։ «Ազատության» թղթակցի այցելության պահին նրա շտաբի դուռը փակ էր, նրա թիմը որևէ հրապարակային հայտարարություն դեռ չի արել:
Գյումրիում երեկ կայացած ընտրություններում որևէ քաղաքական ուժ չի կարողացել հավաքել 50+1 տոկոս՝ իշխանություն ձևավորելու համար։ Այժմ հենց Մարտին Գրիգորյանից է կախված՝ արդյոք ընդդիմության միավորումը տեղի կունենա, թե ոչ։
Նախօրեին Մարտուն Գրիգորյանն ահազանգում էր իր թիմի նկատմամբ ճնշումների մասին: Երեկ օրվա երկրորդ կեսին Գրիգորյանը ասուլիս հրավիրեց՝ հայտարարելով, որ անհայտ անձինք առևանգել են իրենց ցուցակում ընդգրկված ավագանու թեկնածու Անահիտ Խալաթյանին, և որ այս պահին հայտնի չէ նրա գտնվելու վայրը: Հակակոռուպցիոն կոմիտեից էլ «Ազատությանը» հայտնեցին, որ ավագանու թեկնածուն և մի շարք այլ անձինք ձերբակալվել են Կոմիտեի աշխատակիցների կողմից՝ հանցանք կատարելու անմիջականորեն ծագած կասկածի հիմքով:
Նախընտրական շրջանում էլ ուժայինները խուզարկություն էին իրականացրել քաղաքական ուժի գրասենյակում։ Ձերբակալվել էին Մարտուն Գրիգորյանի որդին և հայրը: Մեկօրյա ձերբակալությունից հետո դատարանն ազատ էր արձակել նրանց։
