ԱՄՆ նախկին նախագահ, նախագահական ընտրություններում հանրապետականների թեկնածու դառնալու համար պայքարող Դոնալդ Թրամփի գլխավոր մրցակից Նիկի Հեյլին իր առաջին հաղթանակն է տարել Կոլումբիայի շրջանում՝ ներկուսակցական ընտրություններում, հաղորդում է The New York Times-ը։
Associated Press-ի տվյալներով՝ Հեյլին ստացել է ձայների 62,8 տոկոսը, Թրամփը՝ 33,3 տոկոսը։
Մինչ այս Նիկի Հեյլին հանրապետականների փրայմերիներում հաղթել էր միայն Նևադայում։
ՄԱԿ-ում ԱՄՆ նախկին դեսպան Հեյլին Թրամփի սուր քննադատներից է։ Նա հանդես է գալիս Ուկրաինային տրամադրվող ռազմական օգնության ավելացման օգտին, մինչդեռ Թրամփը խուսափում է Ռուսաստանի նախագահ Վլադիմիր Պուտինին քննադատելուց և պնդում, որ ընտրվելու դեպքում 24 ժամում վերջ կտա ռուս-ուկրաինական պատերազմին:
Անցած շաբաթ Միչիգանում Թրամփը հինգերորդ նախնական հաղթանակը տարավ։ Ըստ դիտորդների՝ սա հաստատում է նրա՝ Հանրապետականի թեկնածուն լինելու անվիճելի կարգավիճակը։
Դիտորդները չեն բացառում, որ Նիկի Հեյլին հրաժարվի պայքարից, եթե նրա համար «սուպեր երեքշաբթի»-ն անհաջող լինի․ մարտի 5-ին ներկուսակցական ընտրություններ կանցկացվեն ԱՄՆ-ի միանգամից 15 նահանգներում։
ԱՄՆ-ի նախագահական ընտրությունները կայանալու են նոյեմբերին։
