Кіраўнік Расеі Ўладзімір Пуцін заяўляе, што сілы РФ ня маюць намеру захапіць украінскі горад Харкаў.
«Што тычыцца Харкава, то такіх плянаў на сёньняшні дзень няма», — сказаў ён, адказваючы на пытаньне.
Пры гэтым Пуцін абвінавачвае Ўкраіну ў сытуацыі, якая склалася на Харкаўшчыне.
«Што да таго, што адбываецца на харкаўскім кірунку. Гэта таксама іхная віна (Украіны. — Рэд.), таму што яны абстрэльвалі і працягваюць, на жаль, абстрэльваць жылыя кварталы прымежных тэрыторый, уключаючы Белгарад... І я казаў публічна, што калі гэта будзе працягвацца, мы вымушаныя будзем стварыць зону бясьпекі, санітарную зону», — заявіў ён.
Расейскія сілы з раніцы 10 траўня пачалі наступальныя дзеяньні ў Харкаўскай вобласьці ўздоўж украінска-расейскай мяжы. Ім удалося захапіць некалькі вёсак, зараз працягваюцца баі за Ваўчанск, горад з даваенным насельніцтвам амаль у 17 тысяч чалавек.
Сакратар Рады нацыянальнай бясьпекі і абароны Ўкраіны Аляксандар Літвіненка заявіў, што на мяжы з Харкаўскай вобласьцю Расея засяродзіла каля 50 тысяч салдатаў, у наступе ўдзельнічаюць больш за 30 тысяч расейскіх салдатаў. Але, паводле яго, пагрозы штурму Харкава пакуль няма.
Галоўнакамандуючы УСУ Аляксандар Сырскі заявіў, што войскі РФ пашырылі зону актыўных баявых дзеяньняў амаль на 70 кілямэтраў, спрабуючы прымусіць Украіну задзейнічаць дадатковую колькасьць брыгад са складу рэзэрвы.
Прэзыдэнт Украіны Ўладзімір Зяленскі ўвечары 16 траўня заявіў, што Сілам абароны «ўдалося дадаць упэўненасьці ў кірунку Ваўчанску», але расейскія абстрэлы не спыняюцца.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
