Міністэрства ўнутраных справаў распрацавала законапраект, які прадугледжвае адміністрацыйную адказнасьць за «невыкананьне абавязкаў у працаўладкаваньні і лячэньні алькагалізму» для асобаў на «прафіляктычным уліку», перадае «Позірк».
Такую заяву начальніка галоўнага ўпраўленьня аховы правапарадку і прафіляктыкі Аляксандра Купчэні распаўсюдзіла прэсавая служба МУС.
Сёньня на «прафіляктычны ўлік» ставяць:
- асуджаных пасьля адбыцьця тэрміну пакараньня,
- бацькоў, зь якіх суд пастанавіў спаганяць плату за ўтрыманьне дзяцей,
- тых, хто ўчыніў хатні гвалт.
МУС таксама ў новым законапраекце прапануе ставіць на «прафіляктычны ўлік»:
- тых, хто вярнуўся зь лячэбна-працоўных прафілякторыяў і
- тых, хто ўчыніў хатні гвалт, нават калі пацярпелы бок заявіў пра прымірэньне.
«Тымі, хто не навучаецца і не працуе, па-ранейшаму ўчыняецца больш за палову злачынстваў. У асноўным — маёмасныя, што тлумачыцца іх імкненьнем атрымаць сродкі для існаваньня», — заявіў у сваю чаргу кіраўнік МУС Іван Кубракоў.
6 лістапада Аляксандар Лукашэнка заявіў пра намер зрабіць платнай мэдыцыну для тых, хто не заняты ў эканоміцы — не працуе або зьехаў з краіны.
У лістападзе беспрацоўныя і іхныя сем’і атрымалі пацяжэлыя квітанцыі на аплату камунальных паслугаў, бо цяпер поўны кошт плацяць усе, хто жыве ў кватэры ці доме, які належыць асобе, не занятай у эканоміцы.
Паводле розных ацэнак, Беларусь пасьля падзеяў жніўня 2020 году пакінулі ад 100 да 600 тысяч грамадзян.
Форум