Сваякі так званых «дармаедаў» пацярпелі ад імкненьня дзяржавы да «сацыяльнай справядлівасьці» ў аплаце паслуг ЖКГ.
Многія беларусы атрымалі квітанцыі за паслугі ЖКГ за кастрычнік 2025 году з значна большымі сумамі.
Улады спасылаюцца на пастанову ўраду № 465 ад 27 жніўня 2025 году «Аб разьліках у сфэры жыльлёва-камунальнай гаспадаркі».
Міністэрства камунальнай гаспадаркі пазьней выпусьціла тлумачэньне пастановы ўраду ў сувязі з шматлікімі зваротамі грамадзян.
«Пастановай Савета Міністраў ад 27 жніўня № 465 у мэтах вызначэньня дадатковых захадаў для залучэньня грамадзян, не занятых у эканоміцы, у працоўную дзейнасьць, зьмененыя падыходы да налічэньня платы за забесьпячэньне ў адносінах да належных ім або займаных імі жылых памяшканьняў», — піша міністэрства.
Ключавая зьмена — у разьліку платы за забесьпячэньне цяплом, гарачай вадой і газам. Да 1 кастрычніка дзейнічаў такі падыход: калі грамадзянін, не заняты ў эканоміцы, быў зарэгістраваны ў сваёй кватэры і жыў там не адзін, то павышаныя тарыфы датычылі толькі ягонай долі ў агульным аб’ёме паслугаў.
Пасьля 1 кастрычніка, калі ўласьнік жыльля ўключаны ў сьпіс «не занятых у эканоміцы», то «эканамічна абгрунтаваныя» тарыфы стасуюцца ўсёй плошчы ўсіх належных яму кватэраў і ўсяго абʼёму спажываных паслуг, нават калі астатнія жыхары працуюць у эканоміцы Беларусі і плоцяць падаткі.
«Ільготная частка, якая раней разьмяркоўвалася паміж жыхарамі, зараз выключаная», — паведаміла міністэрства.
«Асноўная мэта навацыяў — стварэньне больш справядлівай сыстэмы разьмеркаваньня нагрузкі ў жыльлёва-камунальнай сфэры. Дзяржаўныя субсыдыі на камунальныя паслугі закліканыя падтрымліваць у першую чаргу тых грамадзян, якія сваёй працай удзельнічаюць у разьвіцьці эканомікі краіны», — абгрунтоўвае рашэньне ўраду міністэрства жыльлёва-камунальнай гаспадаркі.
Падвышаная плата за жыльлёва-камунальныя паслугі будзе прымяняцца да ўсёй плошчы кватэры, якая належыць не занятаму ў эканоміцы, а не прапарцыйна колькасьці жыхароў.
Улады ўжо 10 гадоў вядуць барацьбу з «сацыяльным утрыманствам». Спачатку гэта быў так званы «дармаедзкі падатак», цяпер — падвышаная плата за камунальныя паслугі плюс пагрозы ад міліцыі. Сам дэкрэт пра «сацыяльнае ўтрыманства» Лукашэнка ня раз карэктаваў, робячы яго яшчэ стражэйшым.
