Выданьне South China Morning Post апытала аналітыкаў і інсайдэраў наконт рашэньня Польшчы зачыніць мяжу зь Беларусьсю.
Апытаныя кажуць, што закрыцьцё мяжы з Беларусьсю стварае праблемы для чыгуначнага транзыту Кітай—Эўропа і можа паставіць пад пагрозу статус Польшчы як транзытнага вузла, калі блякіроўка мяжы захаваецца працяглы час.
Мяжа працягласьцю амаль 400 км была зачыненая з 12 верасьня. Прэм’ер-міністар Польшчы Дональд Туск спасылаўся на заклапочанасьць нацыянальнай бясьпекай з-за вайсковых вучэньняў «Захад-2025».
«Мы ня ведаем, калі мяжа будзе адкрытая, — сказаў Мілаш Віткоўскі, дырэктар па чыгуначных перавозках Польскай экспэдыцыйнай кампаніі. — Усё залежыць ад Расеі і Беларусі».
Лоіс Мо, камэрцыйная менэджарка кітайскай экспэдыцыйнай кампаніі New Silk Road Intermodal, кажа:«Павінен быць уплыў на працу чыгуначнага транзыту Кітай-Эўропа, таму што цягнікі ня могуць прыбываць, а тавары захоўваюцца ў Беларусі. Кліенты зараз у паніцы, бо ім, магчыма, давядзецца перанесьці замовы з перавозак цягнікамі на марскія перавозкі».
Патрык Шчотка, супрацоўнік варшаўскага аналітычнага цэнтру Інстытут Бойма, заявіў, што замарожваньне руху можа прывесьці да затрымак, павелічэньня выдаткаў на захоўваньне і штрафаў па транспартных кантрактах.
«Перавозчыкі паведамляюць, што яны не падрыхтаваліся да раптоўнага закрыцьця, якое выклікае лягістычныя збоі», — дадаў ён.
«Калі закрыцьцё будзе кароткачасовым, яго наступствы будуць абмежаванымі. Аднак працяглае закрыцьцё можа сурʼёзна парушыць паток тавараў, павялічыць выдаткі на лягістыку і аслабіць пазыцыі Польшчы як буйнога транзытнага вузла» — кажа польскі экспэрт.
Цяперашняе закрыцьцё мяжы ўключае тэрмінал Малашэвічы, стратэгічны перагрузачны вузел на скрыжаваньні Эўразьвязу яго ўсходніх суседзяў.
Чыгунка зьяўляецца знакавым праектам у рамках інфраструктурнай ініцыятывы Пэкіну «Адзін пояс, адзін шлях», але кампаніі пазьбягаюць яе паўночнага маршруту, які праходзіць праз Расею, пасьля таго, як супраць Масквы былі ўведзеныя жорсткія санкцыі з-за вайны ва Ўкраіне.
Многія зьвярнуліся да Сярэдняга калідора — абʼяднаньня наземных і марскіх шляхоў з удзелам некалькіх зацікаўленых краін — у якасьці альтэрнатывы. Маршрут праходзіць з Кітая ў Казахстан праз Касьпійскае мора, прычым Польшча зьяўляецца адным з некалькіх пунктаў уваходу ў Эўропу.
У панядзелак Кітай і Польшча «выказалі сваю гатоўнасьць забясьпечыць бясьпеку і даступнасьць чыгуначнага транзыту КНР-ЭЗ» пасьля сустрэчы Міжурадавага камітэту Польшча-Кітай у Варшаве. Сумеснае старшынства на сустрэчы прайшло пад кіраўніцтвам міністраў замежных спраў абедзьвюх краін.
Увэ Лойшнэр, генэральны дырэктар нямецкай транспартна-кансалтынгавай кампаніі Luxx Service і адмысловец у Кітаі, заявіў: «Гэта пытаньне збольшага залежыць ад палітычных рашэньняў эўрапейскага боку адносна сувязі з Кітаем і Расеяй».
Ён адзначыў, што кожная затрымка на чатыры-пяць дзён будзе каштаваць адпраўшчыкам грузаў дадатковых 20 000 даляраў ЗША за арэнду цягнікоў і іншага абсталяваньня паміж Эўропай і іх пунктамі адпраўленьня або прызначэньня ў Кітаі.
Чарльз Чанг, прафэсар фінансаў Фуданскага ўнівэрсытэта ў Шанхаі, сказаў, што гандаль паміж Кітаем і ЭЗ не пацерпіць моцна, таму што ў трэйдараў ёсьць іншыя маршруты, якія праходзяць праз Блізкі Усход або Паўночную Афрыку. «Вось чаму я думаю, што Кітай ужо 15 гадоў прасоўвае ініцыятыву „Адзін пояс, адзін шлях“, якая абапіраецца на некалькі гандлёвых маршрутаў. Ёсьць так шмат спосабаў увайсьці і выйсьці» — мяркуе навуковец.
Форум