Capital Palace збудавалі на месцы зьнесенага будынку «Беларускага дзяржаўнага музэю гісторыі Вялікай айчыннай вайны». Пры гэтым музэй зьнесьлі ўлетку 2014 году, а будаўніцтва цэнтру пачалі толькі ў 2017-м. Аб’ект на тэрыторыі амаль у 1 га быў гатовы яшчэ ў 2021-м, аднак дасюль не пачаў працаваць, піша Onlíner, журналісты якога наведалі месца.
У будынку ўжо працуе падземны паркінг — 4 рублі за гадзіну стаянкі (або 150 эўра за захоўваньне машыны цягам месяца).
Падземны паркінг у новым будынку мае два паверхі. На кожным узроўні па 86 машына-месцаў. Ня так шмат з улікам аб’ёму будынку і патэнцыйнай колькасьці наведнікаў, а таксама офісных супрацоўнікаў. Аднак, паводле забудоўніка, уладкаваць больш машына-месцаў не было як — тэхнічныя абмежаваньні накладае блізкасьць мэтро.
Бізнэс-цэнтар умоўна падзелены на дзьве часткі: для «мінакоў» будзе адкрыты парадны бок — той самы, што зь вялізнымі вокнамі на першым паверсе. Асноўны ж аб’ём будынку аддадзены пад офісы. Пакуль занятыя толькі 13 зь іх.
У правым крыле будынку месьціцца яшчэ адна свабодная прастора на 880 квадратных мэтраў. Як расказаў дырэктар бізнэс-цэнтру, зараз яна называецца «памяшканьнем інтэрактыўнага музэю». Але пры патрэбе зможа памяняць прызначэньне і стаць мастацкай галерэяй, рэстаранам з тэрасай на вуліцы або дадатковай гандлёвай плошчай.
Таксама ў Capital Palace адкрыюць рэстарацыю расейскай сеткі, якой — пакуль не раскрываюць, але рыхтуюцца.
Бізнэс-цэнтар разьлічаны на 4 тысячы чалавек. Афіцыйна яго ўвялі ў эксплюатацыю яшчэ ў 2022 годзе, прыкладна праз год пасьля завяршэньня будаўніцтва. У дырэктараце тлумачаць доўгі прастой грунтоўным пошукам партнэраў і патэнцыйных арандатараў. Дакладнай даты паўнавартаснага адкрыцьця цэнтру ўладальнікі назваць так і ня здолелі.
Форум