Як паведаміла Вольга Карпушонак на сваёй старонцы ў Facebook, яна зьехала з Украіны ў 2024 годзе.
«Павал асабіста і праз калег запрасіў мяне працаваць у НАУ, паабяцаў пратэкцыю, грошы і спакой. Я разьлічвала, што зьехаўшы ў Польшчу, змагу дыхаць свабодна і забыцца пра ўвесь гэты жах. Я глядзела на яго, як на выратавальніка, мне далі працу, я прыйшла ў калектыў, як мне здавалася, ідэйных людзей», – напісала яна.
Паводле яе, у першыя дні пасьле пераезду Павал Латушка запрасіў яе на спатканьне ў рэстаран і намякнуў на магчымыя рамантычныя дачыненьні, але папрасіў не распаўсюджвацца пра гэтую сустрэчу. А на другім спатканьні, калі яна адмовілася ад ад асабістых дачыненьняў, сутыкнулася з «сэксуальнымі дамаганьнямі» і пагрозамі магчымымі праблемамі ў Польшчы і выдварэньня ў Беларусь.
У камэнтары выданьню «Позірк» Павал Латушка зьняпраўдзіў абвінавачаньні Вольгі Карпушонак і назваў іх «паклёпам».
«Перакананы, што гэта праца спэцслужбаў рэжыму», — сказаў Латушка.
Паводле выданьня, ён заявіў аб гатоўнасьці да вочнай стаўкі з Вольгай, а калі неабходна і прайсьці паліграф.
«Яе дзеяньні інсьпіраваныя спэцслужбамі Лукашэнкі. [...] Няма ніводнага слова, ніводнага факту праўды», — сказаў Павал Латушка ў жывым эфіры, які арганізаваў пазьней адмыслова для тлумачэньня гэтай сытуацыі.
Паводле яго, ён атрымлівае пагрозы забойства і выкраданьня. Абвінавачаньні, якія прагучалі на яго адрас ад Вольгі Карпушонак, ён назваў адным з элемэнтаў вайны, якую ажыцьцяўляюць ня толькі супраць яго, а і супраць ягонай арганізацыі.
Павал Латушка дадаў, што Вольга Карпушонак не працавала ў Народным антыкрызісным упраўленьні, а толькі дапамагала як валянтэр. «Ніякіх працоўных дачыненьняў зь ёй не было», — падкрсьліў ён.
Апроч таго, у часе валянтэрства выніклі падазрэньні, што Вольга можа мець сувязь з спэцслужбамі Беларусі і прапанавалі ёй прайсьці паліграф, але яна адмовілася.
Цяпер, паводле інфармацыі Латушкі, Вольга выехала з Польшчы і знаходзіца ў Гішпаніі.
Павал Латушка паведаміў, што пасьля кансультацыі з адвакатам вызначыцца з наступнымі юрыдычнымі дзеяньнямі, сярод якіх разглядае зварот у пракуратуру з заявай аб паклёпе і распаўсюдзе непраўдзівай інфармацыі, а таксама з цывільным пазовам аб абароне годнасьці і рэпутацыі.
«Буду дабівацца, каб яна апублікавала абвяржэньне», — дадаў ён.
Форум