Лукашэнка ў КНР запрошаны на парад на плошчы Цяньаньмэнь, дзе 36 гадоў таму расстралялі пратэстоўцаў

Таксама ён «акрэсьліць ключавыя пытаньні, якія патрабуюць узмоцненай увагі», цытуе інфармацыйнае агенцтва «Позірк».

Саміт пройдзе 31 жніўня — 1 верасьня ў кітайскім Цяньцзіні (адзін з чатырох муніцыпалітэтаў цэнтральнага падпарадкаваньня). Удзел Аляксандра Лукашэнкі ў ім быў анансаваны 22 жніўня.

Заплянавана падпісаньне членамі ШАС «найбольш важных дакумэнтаў», сярод якіх стратэгія разьвіцьця арганізацыі да 2035 года, зазначае прэс-служба.

Лукашэнка таксама прыме ўдзел у саміце ў фармаце «ШАС плюс» з кіраўнікамі дзяржаў-назіральнікаў, міжнародных арганізацый, «высокіх гасьцей».

3 верасьня ў Пэкіне ён прыме ўдзел у мерапрыемствах, прысьвечаных «80-годдзю Перамогі над японскім мілітарызмам і заканчэньню Другой сусьветнай вайны», у тым ліку будзе назіраць за парадам, які пройдзе на плошчы Цяньаньмэнь.

Гэтая плошча сумна вядомая ў сьвеце. На ёй з 15 красавіка па 4 чэрвеня 1989 г. праходзілі мірныя пратэсты, галоўнымі ўдзельнікамі якіх былі студэнты. Пры іх ліквідацыі войскам Кітая з ужываньнем агнястрэльнай зброі і бронетэхнікі па розных ацэнках загінула ад некалькіх сотняў да некалькіх тысяч чалавек.

Цэнзура ў КНР не дапускае свабоднага абмеркаваньня тых падзеяў.

У красавіку 1989 году кітайскія студэнты пачалі пратэсты на пэкінскай плошчы Цяньяньмэнь з патрабаваньнямі правядзеньня дэмакратычных рэформаў і выкараненьня карупцыі. Дэманстрацыі, выкліканыя сьмерцю парткіраўніка-рэфарміста Ху Яобана, неўзабаве перарасьлі ў масавыя прадэмакратычныя выступы. 4 чэрвеня 1989 году кітайскае войска жорстка разагнала пратэстоўцаў. Улады ніколі не апублікавалі афіцыйныя злвесткі аб колькасьці ахвяраў, аднак мяркуецца, што іх былі сотні і нават тысячы. Сёньня кітайскія ўлады не дазваляюць ніякіх дыскусіяў у сродках масавай інфармацыі пра падзеі 1989 году.

Лукашэнка, як паведамляла яго прэс-служба, 28 жніўня падпісаў указы № № 318 і 319, якімі ўхваліў у «якасьці асновы для правядзеньня перамоваў» па двух праектах міжнародных дамоваў, якія тычацца ШАС, у тым ліку супрацоўніцтва ў рамках Антынаркатычнага цэнтра і Унівэрсальнага цэнтра па супрацьдзеяньні выклікам.

Тэксты праектаў не апублікаваны.

Падчас паездкі ў Кіраўскі раён (Магілёўская вобласьць) 28 жніўня Лукашэнка заявіў, што возьме з сабой у Кітай «некалькі мяшочкаў бульбы, каб перадаць іх у падарунак замежным лідэрам».

На нарадзе па пытаньні ракетнай вытворчасьці 21 жніўня ён адзначыў важнасьць тэмы ў кантэксьце супрацоўніцтва з Кітаем і анансаваў сваю паездку туды: «Таму што пачыналі мы ці працягвалі ракетабудаваньне ў цеснай сувязі з кітайскім ваенна-прамысловым комплексам, і зараз у нас ёсьць кантакты».

Лукашэнка наведваў Кітай 2-4 чэрвеня. У рамках візыту адбыліся яго перамовы са старшынёй КНР Сі Цзіньпінам. На трэці дзень пасьля вяртаньня, 7 чэрвеня, палітык адкрыў у Менску нацыянальны футбольны стадыён, пабудаваны, паводле сьцьвярджэньня Лукашэнкі, за кошт Кітая ў якасьці «падарунку».

• Беларусь інтэгравалася ў ШАС амаль 15 гадоў: у 2010 годзе атрымала статус партнэра арганізацыі, у 2015-м — назіральніка. У ліпені 2022 года Менск падаў заяўку на ўступленьне ў ШАС.
• Дакумэнты аб уступленьні Беларусі ў ШАС былі падпісаны 4 ліпеня 2024 года ў Астане (Казахстан). З таго часу Менск зьяўляецца паўнапраўным удзельнікам абʼяднаньня.
• Шанхайская арганізацыя супрацоўніцтва створана ў 2001 годзе. Дэклярацыю аб яе заснаваньні падпісалі кіраўнікі Казахстана, Кітая, Кыргызстана, Расеі, Таджыкістана і Узбэкістана. Пазьней да арганізацыі далучыліся Індыя, Іран, Пакістан.