Прэмʼер-міністар Польшчы Дональд Туск заявіў, што папросіць парлямэнт правесьці вотум даверу свайму кааліцыйнаму ўраду пасьля таго, як яго кандыдат ад «Грамадзянскай плятформы» Рафал Тшаскоўскі прайграў прэзыдэнцкія выбары, піша AFP.
У тэлевізійным звароце ўвечары 2 чэрвеня Туск заявіў, што хоча вотуму даверу «хутчэй» і паабяцаў застацца на сваёй пасадзе, дадаўшы, што выбары «нічога ня зьменяць».
Туск сказаў, што яго ўраду трэба шмат працаваць, і што «першым выпрабаваньнем будзе вотум даверу», пра які ён папросіць «неўзабаве».
Ён таксама сказаў, што гатовы супрацоўнічаць зь пераможцам прэзыдэнцкіх выбараў Каралем Наўроцкім.
«Я хачу, каб усе бачылі — у тым ліку нашы апанэнты, як унутры краіны, так і за мяжой, — што мы гатовыя да гэтай сытуацыі, што мы разумеем сурʼёзнасьць моманту і што мы не маем намеру адступаць ні на адзін крок», — сказаў Туск.
У Польшчы прэзыдэнт мае права вета на законы, і перамога Наўроцкага ўскладняе Туску прасоўваньне яго праэўрапейскага парадку дня.
Учора было абвешчана, што польскі кансэрватыўны палітык Караль Наўроцкі, якога падтрымлівае правая апазыцыйная партыя «Права і справядлівасьць» (PiS), перамог у другім туры прэзыдэнцкіх выбараў, якія адбыліся 1 чэрвеня.
Паводле афіцыйных зьвестак выбарчай камісіі краіны Наўроцкі набраў 50,89%, а яго апанэнт, мэр Варшавы Рафал Тшаскоўскі, які прытрымліваецца праэўрапейскай і лібэральнай палітыкі, — 49,11%.
Форум