У Сэйме Польшчы 4 красавіка абсалютнай большасьцю галасоў (431 з 433) ухвалілі рэзалюцыю аб прэзыдэнцкіх выбарах у Беларусі. Сэйм Польшчы заявіў сярод іншага, што выбары 26 студзеня не адлюстроўваюць палітычнай волі беларускага народа
Ініцыятарам рэзалюцыі выступіла парлямэнцкая група «За свабодную Беларусь».
Дакумэнт адлюстроўвае імкненьне Польшчы падтрымаць народ Беларусі ў нашай барацьбе за свабоду і дэмакратыю, заявіў Павал Латушка, які прысутнічаў на сэсіі Сэйму.
У рэзалюцыі падкрэсьліваецца, што вынікі так званых выбараў «не адпавядаюць міжнародным дэмакратычным стандартам, і іх вынікі ня могуць лічыцца дакладным адлюстраваньнем палітычнай волі беларускага народу».
Дэпутаты Сэйму Польшчы заклікалі польскі ўрад рабіць далейшыя крокі для падтрыманьня беларускага грамадзтва, а таксама выказалі падтрымку актыўнаму ўжываньню міжнародных санкцыяў супраць тых, хто нясе адказнасьць за парушэньні правоў чалавека і задушэньне свабоды ў Беларусі.
Сэйм асудзіў рэпрэсіі ў Беларусі, скіраваныя супраць прадстаўнікоў апазыцыі, незалежных журналістаў і арганізацыяў грамадзянскай супольнасьці.
Сэйм прызнаў «свабодную і сувэрэнную Беларусь адным з ключавых апірышчаў стабільнасьці і бясьпекі ў рэгіёне».
Польскія дэпутаты выказалі падтрымку дзейнасьці беларускіх дэмакратычных сілаў у выгнаньні, якія працягваюць змагацца за пабудову свабоднай і дэмакратычнай Беларусі ў эўрапейскай сямʼі.
У рэзалюцыі рэзалюцыі Сэйму Польшчы адзначаецца непразрыстасьць працэдуры і «парушэньне міжнародных стандартаў».
Абмеркаваньне праекту рэзалюцыі аб апошніх прэзыдэнцкіх выбарах у Беларусі, які ініцыявала парлямэнцкая група «За свабодную Беларусь», адбылося ў Сэйме 19 сакавіка, паведамляе тэлеграм-канал намесьніка кіраўніка Аб’яднанага пераходнага кабінэту (АПК), кіраўніка Народнага антыкрызіснага ўпраўленьня (НАУ) Паўла Латушкі.
