Урад ЗША сьцьвярджаў, што Amadea, якая можа пахваліцца гелікоптэрнай пляцоўкай, басэйнам, джакузі і «зімовым садам на сонечнай палубе», належыць Сулейману Керымаву, расейскаму мільярдэру, які трапіў пад санкцыі ў 2018 годзе ў адказ на «злачынную дзейнасьць Расеі ўва ўсім сьвеце», піша карэспандэнт Радыё Свабодная Эўропа / Радыё Свабода Майк Экель.
З гэтай прычыны Міністэрства юстыцыі ЗША сканфіскавала яхту на Фіджы, а затым даставіла ў Сан-Дыега, штат Каліфорнія.
Аднак адвакаты Эдуарда Худайнатава, былога кіраўніка расейскага дзяржаўнага нафтавага гіганта «Роснефть», сьцьвярджалі, што нібыта ён быў сапраўдным уладальнікам і што пазоў ураду ЗША ня быў падмацаваны доказамі.
18 сакавіка Фэдэральны суд ЗША даў канчатковую згоду Міністэрству юстыцыі на продаж яхты Amadea з аўкцыёну празь некалькі дзён пасьля адмовы Худайнатава ад прэтэнзіяў на права ўласнасьці.
Злучаныя Штаты і Эўрапейскі Зьвяз пачалі ўводзіць санкцыі супраць расейскіх алігархаў пасьля анэксіі Расеяй украінскага Крыму ў 2014 годзе.
Высновы ўраду ЗША аб умяшаньні Расеі ў прэзыдэнцкія выбары ў Злучаных Штатах 2016 году прывялі да новых санкцыяў.
Керымаў, які зарабіў свае мільярды на гандлі нафтай і праз буйны холдынг у дзяржаўным газавым гіганце «Газпром», стаў мішэньню абодвух санкцыйных пакетаў.
Пасьля поўнамаштабнага ўварваньня Расеі ва Ўкраіну ў лютым 2022 году расейскія эліты імкнуліся вывесьці актывы і маёмасьць з поля зроку заходніх уладаў, якія імкнуліся яшчэ больш узмацніць санкцыі. У траўні таго ж году ўлады ціхаакіянскага вострава Фіджы сканфіскавалі Amadea на падставе абвінаваўчага ордэру ЗША зь сьцьверджаньнем, што яхта насамрэч належала Керымаву.
Форум