Яе запрасілі туды разам з актывісткай, былой палітзьняволенай Палінай Шарэндай-Панасюк, а таксама прадстаўніцамі Ўкраіны журналісткай Леніяй Умеравай і валянтэркай Татай Кеплер.
11 сакавіка ў Страсбургу адбылася спэцыяльная пленарная сэсія Эўрапарлямэнту, прысьвечаная Міжнароднаму дню жанчын, на яе адкрыцьці Сьвятлана Ціханоўская выступіла з прамовай перад 700 эўрадэпутатамі.
Сьвятлана Ціханоўская прысьвяціла прамову ролі жанчын у змаганні за дэмакратыю і свабоду, падкрэсліўшы гераізм жанчын, якія супрацьстаяць рэпрэсіям і вайне.
«Я заўсёды кажу, што нетрадыцыйныя часы патрабуюць нетрадыцыйных рашэньняў. Летась мы зрабілі такі крок разам. Мы падпісалі мэмарандум аб супрацоўніцтве паміж Беларускімі дэмакратычнымі сіламі і Эўрапейскім Парлямэнтам. І гэта было дакладнае пасланьне майму народу: Беларусь — гэта Эўропа. І аднойчы мы зоймем сваё законнае месца ў гэтай палаце», — сказала Сьвятлана Ціханоўская, якую цытуе Reform.news.
Ціханоўская нагадала, што на мінулым тыдні ў Рыме адбыўся другі саміт дэпутацкіх групаў, якія падтрымліваюць дэмакратычную Беларусь.
«Дэпутаты з 17 эўрапейскіх краін падпісалі Рымскі мэмарандум, які паказвае, што барацьба Беларусі за свабоду — гэта таксама барацьба Эўропы», — сказала яна.
Ціханоўская выказала падзяку эўрапейскім краінам, якія апошнімі гадамі прынялі беларусаў. Яна падкрэсьліла агульнасьць лёсаў Беларусі, Украіны, а таксама Грузіі, Малдовы і Армэніі.
«Мы ўсе знаходзімся ў адной зоне няпэўнасьці, пытаючыся ў сябе, хто будзе з намі. Ці будуць нашы краіны калі-небудзь у бясьпецы і вольныя?
Ці мы застанемся ў цені гіганта, сілы, якая не паважае нас, не прызнае наш сувэрэнітэт і адмаўляе нашае месца як свабодных краін Эўропы? Ці павінны мы быць прынесеныя ў ахвяру, прапанаваныя гіганту ў надзеі, што, калі даць яму толькі нас, ён спыніцца, што ён возьме тое, што хоча, і ня пойдзе далей?
Але мы ведаем гісторыю. Голад імпэрыяў ніколі не спатольваецца. Так, мы жывем у няпэўны час, але няпэўнасьць не павінна прыводзіць да ваганьняў. Хто абароніць Эўропу, калі ня самі эўрапейцы? Ці павінны мы заўсёды глядзець праз Атлянтыку ў пошуках абароны, ці прыйшоў час сказаць, што мы будзем адстойваць адно аднаго, нашу і вашу свабоду, як абвяшчае вядомы дэвіз?» — сказала яна.
Гаворачы пра вайну ва Ўкраіне, яна заявіла, што Ўладзімір Пуцін і Аляксандр Лукашэнка ня хочуць міру, а хочуць толькі падпарадкаваньня.
«Свабодная Беларусь магчымая толькі тады, калі Эўропа будзе моцнай і адзінай. Калі вы абмяркоўваеце пераўзбраеньне Эўропы, я заклікаю вас разглядаць падтрымку Беларусі як інвэстыцыі ў вашую ўласную бясьпеку. Беларусь — ключ да спыненьня прасоўваньня Расеі ў Эўропе. Без свабоднай і незалежнай Беларусі пагроза вайны ня спыніцца ні для Украіны, ні для Эўропы», — дадала яна.
Ціханоўская заклікала павялічыць дапамогу беларускім незалежным СМІ, паказаць ясную эўрапейскую пэрспэктыву для беларусаў, а таксама ўзмацніць ціск на Лукашэнку.
Форум