Лінкі ўнівэрсальнага доступу

Экс-прэзыдэнта Філіпін Дутэртэ затрымалі на запыт Інтэрпола. Падазраюць у арганізацыі масавых забойстваў


Радрыга Дутэртэ, 2024
Радрыга Дутэртэ, 2024

Былога прэзыдэнта Філіпін Радрыга Дутэртэ арыштавалі па справе аб злачынствах супраць чалавечнасьці. Аб гэтым паведамляе Manila Bulletin, спасылаючыся на афіцыйныя дакумэнты.

Нацыянальная паліцыя Філіпін пацьвярджае арышт былога прэзыдэнта Радрыга Дутэртэ раніцай 11 сакавіка, гаворыцца ў заяве, апублікаванай філіпінскім інфармацыйным агенцтвам, якое зьяўляецца службай навін урада краіны.

«Нацыянальная паліцыя Філіпін пацьвярджае, што яна дапамагала Філіпінскаму міжнароднаму цэнтру барацьбы са злачыннасьцю ў аўторак (11 сакавіка) у выкананьні паведамленьня Міжнароднай арганізацыі крымінальнай паліцыі (Інтэрпол) супраць былога прэзыдэнта Радрыга Роа Дутэртэ пасьля яго прыбыцьця ў міжнародны аэрапорт Ніной. Акіна з Ганконга», — гаворыцца ў паведамленьні.

Паліцыя паведамляе, што для мірнай арганізацыі працэсу ў аэрапорце яны задзейнічалі 379 супрацоўнікаў.

Раней міжнародныя СМІ паведамілі аб затрыманьні 79-гадовага Дутэртэ па запыце Міжнароднага крымінальнага суда. Дачка экс-прэзыдэнта Вераніка Дутэртэ апублікавала ў сваіх Instagram stories відэа, у якім ён пытаецца аб падставах яго арышту.

Абвінавачваньні супраць Дутэртэ тычацца масавых пазасудовых пакараньняў сьмерцю падчас яго прэзыдэнцтва пад падставай барацьбы з наркатрафікам. Паводле ацэнак паліцыі, загінула больш за 6 тысяч чалавек, але праваабаронцы мяркуюць, што забойстваў было значна больш.

У 2019 годзе Дутэртэ вывеў Філіпіны з Міжнароднага крымінальнага суда. Але суд захоўвае юрысдыкцыю ў дачыненьні да злачынстваў, якія адбыліся ў краінах падчас іх сяброўства ў судзе — гэта значыць з 2016 года, калі Дутэртэ стаў прэзыдэнтам, да 2019 года.

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.
Ігар Лосік Кацярына Андрэева Ірына Слаўнікава Марына Золатава
XS
SM
MD
LG