У «сьпіс тэрарыстаў», які вядзе КДБ Беларусі, дадалі былых сілавікоў, што выступалі супраць гвалту

Зьмены адлюстраваныя ў дакумэнце, апублікаваным у спэцыяльным тэлеграм-канале КДБ.

Як піша «Вясна», у «тэрарыстычным» сьпісе зьявіліся асуджаныя на невядомыя тэрміны:

• палітзьняволеныя былыя сілавікі з Жодзіна Дзьмітры Удовін, Андрэй Дарошка, Вячаслаў Ільіч, Ігар Кісьляк і Віталь Папрэцкі, якія ў жніўні 2020 году запісалі зварот да калег з просьбай не станавіцца карнікамі (асуджаныя ў 2025 годзе за нібыта «заклікі да санкцыяў» і «распальваньне варожасьці» па арт. 361 і 130 Крымінальнага кодэксу; унесеныя ў пералік «экстрэмістаў», які вядзе МУС).
• палітвязень Сяргей Горлаў, асуджаны за нібыта «заклікі да санкцыяў», «абразу Лукашэнкі» і «распальваньне варожасьці», (арт. 361, 368, 130 Крымінальнага кодэксу),
• Сяргей Зеляноўскі, асуджаны за «заклікі да санкцыяў» (арт. 361),
• Віктар Кухарчук, асуджаны за «распальваньне варожасьці» (арт. 130 КК).

Цяпер у «сьпісе тэрарыстаў» КДБ 1385 пазыцыі і 1276 чалавек, зь іх сама меней 588 — грамадзяне Беларусі. Абвешчаным «тэрарыстамі» зьняволеным забаронена атрымліваць грашовыя пераводы.

Улады Беларусі выкарыстоўваюць сьпіс тэрарыстаў для ўзмацненьня ціску на палітычных апанэнтаў, пагаршэньня становішча палітвязьняў у турмах.

У гэты сьпіс нядаўна трапіў сярод іншых кіраўнік зьліквідаванай партыі «Зялёныя» Зьміцер Кучук, пакараны на 6 гадоў калёніі ў палітычна матываванай справе.

ГЛЯДЗІЦЕ ТАКСАМА:

КДБ дадаў у «сьпіс тэрарыстаў» зьняволенага кіраўніка зьліквідаванай партыі «Зялёныя»