Аляксандар Лукашэнка падпісаў закон, які ратыфікуе дамову Расеі і Беларусі аб гарантыях бясьпекі ў рамках саюзнай дзяржавы дзьвюх краінаў, паведамляе РБК. Гэта адбылося пасьля зацьвярджэньня дакумэнту Саветам Рэспублікі.
28 лютага адпаведны закон падпісаў прэзыдэнт Расеі Ўладзімір Пуцін.
Такім чынам, працэс ратыфікацыі дамовы завершаны з абодвух бакоў.
Згодна з падпісаным дакумэнтам:
- Беларусь і Расея разглядаюць збройны напад на ўдзельніка саюзнай дзяржавы як акт агрэсіі супраць аб’яднаньня ў цэлым;
- Расейская ядзерная зброя можа быць ужытая ў адказ на выкарыстаньне супраць любога з бакоў ядзернай зброі або іншых відаў зброі масавага зьнішчэньня, а таксама ў выпадку агрэсіі з ужываньнем канвэнцыйнай зброі, якая стварае крытычную пагрозу сувэрэнітэту або тэрытарыяльнай цэласнасьці;
- Для прадухіленьня актаў агрэсіі на тэрыторыі Беларусі могуць стварацца вайсковыя абʼекты і разьмяшчацца расейскія вайсковыя фармаваньні.
Дамова заключаецца на дзесяць гадоў з аўтаматычным працягам на наступныя дзесяцігадовыя пэрыяды і ўступае ў сілу з дня абмену ратыфікацыйнымі граматамі. Як адзначаў Пуцін, дакумэнт вызначае ўзаемныя саюзьніцкія абавязаньні па забесьпячэньні абароны, абароны сувэрэнітэту, незалежнасьці і канстытуцыйнага ладу, цэласнасьці і недатыкальнасьці тэрыторыяў Расеі і Беларусі.
Форум