У камандаваньні Паветраных сіл Украіны ўдакладнілі, што ў ноч на 26 лютага расейскія войскі запусьцілі па краіне 177 ударных дронаў і бесьпілётнікаў-імітатараў. Зь іх 110 удалося зьбіць, а 66 — абясшкодзіць пры дапамозе сродкаў радыёэлектроннай барацьбы. Паводле ўкраінскіх маніторынгавых каналаў, сама меней адзін дрон паляцеў у бок Беларусі.
На фронце інтэнсіўнасьць прасоўваньня расейскіх вайскоўцаў крыху запаволілася — баявыя дзеяньні перамясьціліся з-пад Пакроўску ў Вялікую Навасёлку (Ланецкая вобласьць).
У Краматорску адзін чалавек загінуў і 16 параненыя
Улады Данецкай вобласьці паведамілі аб ахвярах сярод цывільных у выніку расейскага ўдару па Краматорску ўвечары 25 лютага — папярэдне, адзін чалавек загінуў і 16 атрымалі раненьні, у тым ліку чацьвёра дзяцей.
Выратавальныя брыгады працягваюць разьбіраць завалы, а ўлады заклікаюць грамадзян тэрмінова пакінуць прыфрантавы горад.
Тым часам сытуацыя на лініях фронту ў Данецкай вобласьці крыху зьмянілася. Паводле аналітычнага праекту DeepState, пасьля захопу Вялікай Навасёлкі расейскія войскі запаволілі сваё прасоўваньне і цяпер спрабуюць назапасіць рэсурсы, перагрупавацца і аднавіць сваю актыўнасьць. Цяпер для іх галоўная цэль — населены пункт Камар (Валнаваскі раён), празь які праходзіць лягістыка ўкраінскіх сіл абароны ў раёне Андрэеўкі.
Паводле аналітыкаў, актыўнасьць расейцаў на пакроўскім кірунку крыху зьнізілася, а ініцыятыва перайшла да ўкраінскага войска. На гэтай лініі фронту расейскія сілы захапілі сяло Запарожжа, але маюць праблемы з ратацыяй асабовага складу, эвакуацыяй цяжкапараненых і падвозам боекамплектаў, лекаў і харчу.
Аналітыкі сьцьвярджаюць, што на гэтым кірунку фронту ў штурмах расейцы пачалі выкарыстоўваць легкавыя аўтамабілі, матаблёкі, а ў забесьпячэньні — аслоў і коней. Паводле ўкраінскага боку, тут расейцы таксама спрабуюць перагрупавацца пасьля істотнага прасоўваньня. У той жа час сытуацыя няўстойлівая, адзначаюць аналітыкі, і ў любы час можа зьмяніцца.
Ахвяры сярод цывільных яшчэ ў трох рэгіёнах
У Бучанскім раёне Кіеўскай вобласьці расейскі дрон пацэліў у прыватны дом, узьнік пажар на плошчы 200 квадратных мэтраў. Пасьля таго, як агонь патушылі, выратавальнікі знайшлі цела аднаго загінулага, а потым яшчэ адной загінулай. Пазьней паведамілі, што ў пажары, які пачаўся ад пацэльваньня расейскага дрону загінулі сужэнцы — вядомы ўкраінскі анколяг Павал Іванчаў і журналістка дзяржаўнага агенцтва «Укрінформ» Тацяна Кулік.
Яшчэ ў адным населеным пункце пад Кіевам з раненьнямі шпіталізавалі 20-гадовую дзяўчыну, а 44-гадоваму мужчыну аказалі дапамогу на месцы.
Усяго ад расейскага абстрэлу ў Бучанскім раёне пацярпелі пяць прыватных дамоў і яшчэ ў чатырох павыляталі шыбы ад выбуховай хвалі; тры аўтамабілі згарэлі і 8 атрымалі пашкоджаньні.
У Харкаўскай вобласьці адзін чалавек паранены. У Харкаве расейскія войскі ўдарылі дронамі ў шматкватэрныя жылыя дамы, унівэрсытэт і тэатар — у дзьвюх жанчын вострая рэакцыя на стрэс, яшчэ пяцярых выратавалі ў часе тушэньня пажараў пасьля абстрэлу.
Пад штодзённымі абстрэламі Купянскі і Багадухаўскі раёны Харкаўскай вобласьці, у якіх таксама пацярпеў жылы сэктар. У Купянскім раёне адзін чалавек атрымаў раненьні.
Раненьні атрымаў і адзін грамадзянін у Сумскай вобласьці, дзе адбылося 15 выбухаў.
Сілы супрацьпаветранай абароны працавалі таксама ў Чаркаскай, Хмяльніцкай і Кіраваградзкай абласьцях. Улады пакуль не паведамляюць аб выніках расейскай атакі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум