«Горад зазнаў шматлікія авіяўдары сёньня раніцай. Пад заваламі дамоў могуць знаходзіцца людзі, пошукавая апэрацыя працягваецца», — напісаў ён у Тэлеграме.
Паводле папярэдніх ацэнак, пашкоджаны 10 шматпавярховых дамоў, 21 прыватны дом, тры прамысловыя памяшканьні, дзьве лініі электраперадач і два газаправоды, крама, 16 гаражоў і дзевяць аўтамабіляў. Сярод пацярпелых — перасяленцы з Бахмуту, акупаванага расейскім войскам.
Увечары 22 лютага стала вядома, што расейскае войска зноў нанесла ўдар па Канстанцінаўцы, патрапіўшы ў жылы дом. Ад удару загінула жанчына, яе цела з-пад завалаў вынялі ратавальнікі, паведаміў парамэдык паліцыі гораду Сяргей Сласьценка. Яшчэ тры чалавекі атрымалі раненьні, перадае 22 лютага карэспандэнт праекту Радыё Свабода «Донбас Реалії». У адной жанчыны лёгкія траўмы твару ад разьбітага шкла, у мужчыны — страсеньне мозгу, у яшчэ аднаго мужчыны — кантузія.
Паводле Сласьценкі, за содні гэта ўжо другое прамое трапляньне ў шматпавярховы дом у Канстанцінаўцы. Раней у выніку расейскай агрэсіі ў горадзе загінулі тры чалавекі, яшчэ тры былі параненыя.
Расейскае Мінабароны інфармацыю пра сёньняшнія атакі на Канстанцінаўку не камэнтавала.
Расейскія вайскоўцы рэгулярна з розных відаў узбраеньня атакуюць украінскія рэгіёны. Кіраўніцтва Расеі адмаўляе, што расейскае войска падчас поўнамаштабнай вайны наносіць мэтанакіраваныя ўдары па грамадзянскай інфраструктуры гарадоў і вёсак Украіны, забіваючы мірных жыхароў і разбураючы бальніцы, школы, дзіцячыя сады, аб’екты энэргетыкі і водазабесьпячэньня.
Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы Расеі і падкрэсьліваюць, што яны маюць мэтанакіраваны характар.
Форум