У камандаваньні Паветраных сіл Украіны паведамілі, што расейскія войскі ў ноч на 21 лютага атакавалі Ўкраіну 160 ударнымі дронамі і бесьпілётнікамі-імітатарамі.
Апроч таго, з тэрыторыі анэксаванага Крыму расейскія войскі запусьцілі дзьве балістычныя ракеты «Іскандэр-М/KN-23» па Адэскай вобласьці.
«У выніку варожай атакі пацярпелі Адэшчына, Кіеўшчына, Палтаўшчына і Харкаўшчына», — адзначаецца ў паведамленьні.
У той жа час мясцовыя ўлады не паведамляюць аб маштабах наступстваў гэтай атакі. Вядома, што ў Запароскай вобласьці ў выніку расейскага абстрэлу загінуў адзін чалавек і яшчэ адзін атрымаў раненьні.
Сілы супрацьпаветранай абароны зьбілі 87 ударных дронаў над 12 абласьцямі, а 70 бесьпілётнікаў змаглі абясшкодзіць сродкі радыёэлектроннай барацьбы.
Згодна з паведамленьнем украінскага маніторынгавага каналу, як мінімум тры баявыя дроны зьмянілі свой рух і накіраваліся ў бок Беларусі — у 23:52 у кірунку Верхніх Жараў, у 01:10 у кірунку Лельчыц і ў 03:30 у кірунку Століна.
Улады Беларусі пра гэтыя інцыдэнты нічога не паведамляюць.
Расея адкрыла чыгуначны маршрут Растоў — Марыюпаль
У Цэнтры вывучэньня акупацыі, які ачольвае Пятро Андрушчанка, колішні дарадца мэра Марыюпаля, паведамілі, што Расея змагла запусьціць паўнавартасны чыгуначны рух па маршруце Растоў — Марыюпаль — Валнаваха — Данецк.
«Расейскія акупанты пабудавалі чыгунку, каб скараціць шлях дастаўкі вайсковай тэхнікі на фронт з Растова да Марыюпалю і Валнавахі. Далей чыгунку плянуюць запусьціць у Крым», — адзначаецца ў паведамленьні.
Паводле экспэртаў, гэты чыгуначны шлях «у глыбокім тыле» павінен спрасьціць вайсковую лягістыку і зьменшыць залежнасьць расейскай арміі ад Крымскага моста.
На фронце Расея павялічыла да амаль 3 тысяч колькасьць выкарыстаных дронаў
У Генэральным штабе Ўзброеных сіл Украіны паведамілі, што за апошнія 24 гадзіны адбылося 121 баявое сутыкненьне.
«Вораг нанёс па пазыцыях украінскіх падразьдзелаў і населеных пунктах тры ракетныя і 93 авіяцыйныя ўдары, выкарыстаў 17 ракет і скінуў 151 кіраваную авіябомбу. Апроч гэтага, ажыцьцявіў больш за 5500 абстрэлаў, у тым ліку 129 — з рэактыўных сыстэм залпавага агню, і выкарыстаў 2650 дронаў-камікадзэ», — адзначаецца ў афіцыйным паведамленьні.
Найбольш напружаная сытуацыя, як і раней, застаецца на пакроўскім кірунку ў Данецкай вобласьці — там расейцы зьдзейсьнілі 34 атакі. Іх, паводле Генштабу, змаглі адбіць.
Баявыя дзеяньні працягваюцца на харкаўскім, купянскім, ліманскім, сіверскім, краматорскім, тарэцкім і курскім кірунках.
У Курскай вобласьці расейскія падразьдзелы ажыцьцявілі 29 штурмаў украінскіх пазыцый, і актыўна выкарыстоўвалі авіяцыю і артылерыю для іх абстрэлу.
Згодна з паведамленьнем украінскага аналітычнага праекту DeepState, расейскія войскі вярнулі пад свой кантроль Свердлікава ў Суджанскім раёне і працягваюць ціск на захадзе тэрыторыі курскай групоўкі Сіл абароны Ўкраіны.
Адначасова расейскія войскі пачалі «актыўна паляваць» на лягістычныя маршруты, па якіх дастаўляюцца боепрыпасы з Сумскай вобласьці. Паводле аналітыкаў, гэтую лягістыку абстрэльваюць з артылерыі і дронамі.
«Для ворага паўстае відавочная і ўжо звыклая мэта — лягістыка. На жаль, яны дасягнулі ў гэтым посьпеху па агнявым кантролі і актыўна намагаюцца дасягнуць яго фізычна, рухаючыся з заходняй часткі. Гэта ўжо мае непрыемныя наступствы і далей можа скласьціся ня вельмі добра», — мяркуюць аналітыкі.
У Міністэрстве абароны Расеі адзначаюць посьпехі на курскім кірунку, але не ўдакладняюць прасоўваньня сваіх войскаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум