Лінкі ўнівэрсальнага доступу

Ва Ўкраіне ідэнтыфікавалі расейскага генэрала, які загадаў нанесьці ўдар па Мікалаеўскай абласной адміністрацыі


У выніку расейскага ракетнага ўдару частка абласной адміністрацыі была зруйнаваная. Большасьць супрацоўнікаў пасьпелі выйсьці. Пад заваламі засталіся восем цывільных. 29 сакавіка 2022 году. Ілюстрацыйнае фота
У выніку расейскага ракетнага ўдару частка абласной адміністрацыі была зруйнаваная. Большасьць супрацоўнікаў пасьпелі выйсьці. Пад заваламі засталіся восем цывільных. 29 сакавіка 2022 году. Ілюстрацыйнае фота

Тады загінула кіраўніца беларускага культурнага таварыства «Голас Радзiмы» Тацяна Дзяменьнікава.

У Службе бясьпекі Ўкраіны паведамілі аб падазрэньні расейскаму генэралу Аляксандру Дворнікаву, які выдаў загад нанесьці 29 сакавіка 2022 году ракетны ўдар па Мікалаеўскай абласной адміністрацыі.

На той момант Аляксандар Дворнікаў камандаваў Паўднёвай вайсковай акругай Узброеных сіл Расеі. У студзені 2023 году ён пайшоў у адстаўку, а з пачатку 2024 году ўзначальвае Добраахвотнае таварыства спрыяньня арміі, авіяцыі і флёту Расеі.

Расейскія войскі выкарысталі для атакі адміністрацыйнага будынку крылатую ракету клясы «зямля—зямля». Яе запусьцілі з апэратыўна-тактычнага комплексу «Іскандэр», які базаваўся ў анэксаваным Расеяй Крыме.

У выніку ўдару тады 28 чалавек атрымалі раненьні, загінулі 36 чалавек, у тым ліку Тацяна Дзяменьнікава, якая ачольвала ў Мікалаеўскай вобласьці беларускае культурнае таварыства «Голас Радзiмы» і працавала ў эканамічным дэпартамэнце Мікалаеўскай абласной дзяржаўнай адміністрацыі. Яе цела дасталі з-пад завалаў толькі на пяты дзень пасьля атакі Расеі.

Сьледчыя СБУ абвінавачваюць Аляксандра Дворнікава ў парушэньні законаў і звычаяў вайны, учыненым паводле папярэдняй групавой змовы, што прывяло да гібелі людзей. Паводле ч. 2 артыкулу 28, ч. 2 артыкулу 438 Крымінальнага кодэксу Ўкраіны яму пагражае ад 10 да 15 гадоў пазбаўленьня волі або пажыцьцёвае зьняволеньне.

Аляксандар Дворнікаў пад міжнароднымі санкцыямі Канады і Эўразьвязу з 2019 году за інцыдэнт у Керчанскай пратоцы, калі расейскія караблі затрымалі ўкраінскія караблі, якія спрабавалі прайсьці з Адэсы ў Марыюпаль. Інцыдэнт адбыўся 25 лістапада 2018 году.

Пасьля расейскага ваеннага ўварваньня ва Ўкраіну ў 2022 годзе да гэтых санкцыяў далучыліся Вялікая Брытанія, Швайцарыя, Аўстралія, Японія, Новая Зэляндыя і Ўкраіна.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
  • 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
  • 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG