У ноч на 11 лютага расейскія войскі атакавалі газавую інфраструктуру Ўкраіны і прыфрантавыя тэрыторыі.
Украінскі бок зноў нанёс удар па нафтаперапрацоўчым заводзе ў Саратаве і вайсковым аэрадроме ў Энгельсе, адкуль у неба падымаюцца самалёты для абстрэлу Ўкраіны.
У Саратаве на НПЗ зноў пажар
Губэрнатар Саратаўскай вобласьці Раман Бусаргін паведаміў аб пашкоджаньнях «на прамысловым прадпрыемстве ў Саратаве».
Паводле яго, пацярпелых няма, а «ўзгараньне» ўдалося патушыць праз 2,5 гадзіны.
Шэраг расейскіх Telegram-каналаў паведамілі пра ўдар па Энгельсе ў Саратаўскай вобласьці, дзе знаходзіцца база стратэгічнай авіяцыі Расеі. Мясцовыя жыхары пацьвердзілі гэтую атаку і пажары на вайсковы аэрадроме, але ўлады сытуацыі ў сваіх паведамленьнях ня згадваюць.
У Міністэрстве абароны Расеі паведамілі, што ў ноч над Саратаўскай вобласьці «перахапілі і зьнішчылі» амаль палову ад усіх дронаў, якія зайшлі на расейскую тэрыторыю. Як сьцьвярджаюць у ведамстве, з 40 бесьпілётнікаў 18 зьбілі над Саратаўскай вобласьцю, 13 — над Растоўскай, 6 — над Бранскай, 2 — над Валгаградзкай і адзін — на Белгарадзкай абласьцямі.
Улады ўсіх іншых расейскіх рэгіёнаў сьцьвярджаюць, што ў выніку падзеньня аскепкаў дронаў ніхто не пацярпеў і абышлося без разбурэньняў.
У Палтаўскай вобласьці 9 населеных пунктаў засталіся без ацяпленьня
Расея атакавала тылавыя вобласьці Ўкраіны і ракетамі, і дронамі.
У Палтаўскай вобласьці ў выніку ракетнага ўдару без газазабесьпячэньня засталіся 9 населеных пунктаў у Міргарадзкім раёне. Але ўлады сьцьвярджаюць, што пацэльваньняў у аб’екты цывільнай інфраструктуры не было.
Міністар энэргетыкі Ўкраіны Герман Галушчанка паведаміў, што ўначы Расея атакавала энэргасыстэму, у тым ліку газавую інфраструктуру. Паводле яго, каб мінімізаваць магчымыя наступствы для энэргасыстэмы, увялі экстранныя абмежаваньні энэргазабесьпячэньня.
На фронце сытуацыя стабільна напружаная
У Генэральным штабе Ўзброеных сіл Украіны паведамілі, што за апошні дзень на фронце адбылося 139 баявых сутыкненьняў.
Расейскія войскі абстрэльвалі пазыцыі ўкраінскіх вайскоўцаў і прыфрантавыя тэрыторыі на поўдні, поўначы і ўсходзе. Усяго, згодна з ацэнкамі Генштабу, расейцы нанесьлі 100 авіяўдараў, у часе якіх скінулі 140 кіраваных авіябомбаў, а таксама ажыцьцявіў амаль 6 тысяч абстрэлаў, у тым ліку 200 — з рэактыўных сыстэм залпавага агню, і выкарыстаў 2853 баявых дронаў.
У прыфрантавых населеных пунктах Запароскай вобласьці 1 чалавек загінуў і 5 атрымалі раненьні, Херсонскай вобласьці — 2 чалавекі загінулі і 6 атрымалі раненьні, Днепрапятроўскай — 4 параненыя.
Найбольш складаная сытуацыя застаецца на пакроўскім кірунку — там расейцы ажыцьцявілі 47 штурмаў украінскіх пазыцый, і ў Курскай вобласьці.
«У апэрацыйнай зоне на Куршчыне падразьдзелы Сіл абароны Ўкраіны за апошні дзень адбілі 27 атак расейскіх захопнікаў. Праціўнік ажыцьцявіў 450 артылерыйскіх абстрэлаў [...] і 48 авіяўдараў з выкарыстаньнем 67 КАБ», — адзначаецца ў паведамленьні Генштабу Ўкраіны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум