Прэзыдэнт ЗША Дональд Трамп падпісаў указ, якім уводзяцца мыты ў 25% на ўсю сталь і алюміній, якія імпартуюцца ў краіну.
Дакумэнт не прадугледжвае выключэньняў, падкрэсьліў Трамп. Мытамі будзе абкладацца ўся сталь і ўвесь алюміній, якія пастаўляюць у ЗША такія краіны, як Канада, Бразылія, Мэксыка, Паўднёвая Карэя, Віетнам і іншыя вытворцы.
Па словах Трампа, прынятыя меры спросьцяць сыстэму мытаў на мэталы. Ён анансаваў іх напярэдадні, таксама паабяцаўшы ў найбліжэйшай будучыні ўвесьці мыты ў адказ у дачыненьні да дзяржаў, якія прымяняюць тарыфы на амэрыканскія тавары.
Дарадца Трампа ў пытаньнях гандлю Пітэр Навара падкрэсьліў, што мыты дапамогуць амэрыканскім вытворцам сталі і алюмінія, яны таксама накіраваныя на ўмацаваньне эканамічнай і нацыянальнай бясьпекі ЗША.
Падчас свайго першага прэзыдэнцкага тэрміна Трамп ужо ўводзіў мыты ў памеры 25% на сталь і 10% на алюміній, але пазьней даў некаторым гандлёвым партнэрам ЗША — Канадзе, Мэксыцы і Бразыліі — квоты на бязмытны гандаль.
Адміністрацыя Трампа раней заяўляла, што з 4 лютага плянуе ўвесьці 25-працэнтныя мыты на імпарт тавараў з Канады і Мэксыкі, а таксама 10-працэнтныя — на імпарт з Кітая. Незадоўга да гэтай даты ЗША, Канада і Мэксыка дамовіліся аб адтэрміноўцы ўвядзеньня тарыфаў.
Таксама Трамп заяўляў аб намеры абкласьці мытамі імпарт усіх паўправаднікоў і фармацэўтычных прэпаратаў. Акрамя таго, Вашынгтон разглядае магчымасьць увядзеньня 10-працэнтных мытаў на ўсе тавары з Эўразьвязу.
Форум