Дзясяткі тысяч людзей выйшлі на плошчу Свабоды ў Братыславе другі раз за два тыдні. Удзельнікі трымалі ліхтарыкі сваіх мабільных тэлефонаў, скандуючы «У адстаўку, у адстаўку», «Расейскі агент» і «Славаччына — гэта Эўропа».
Яны запатрабавалі неадкладна спыніць любое супрацоўніцтва з Расеяй, абвінавачваючы прэмʼер-міністра Фіца ў супрацоўніцтве з аўтакратамі і спробе ператварыць Славаччыну ў аўтакратыю.
Пратэсты прайшлі ў 41 месцы ў Славаччыны, у параўнаньні з 28 двума тыднямі раней, а таксама ў 13 гарадах за мяжой, паведамляе Associated Press са спасылкай на арганізатараў. Навіновы сайт Dennik ацаніў колькасьць людзей на плошчы Свабоды ў Браціславе да 45 тысяч чалавек.
Вулічныя пратэсты сталі найбуйнейшымі з 2018 году, калі забойствы журналіста-расьсьледніка і ягонай нявесты справакавалі палітычныя ўзрушэньні, якія прывялі да краху папярэдняга ўраду Фіца.
Робэрт Фіца вярнуўся да ўлады ў 2023 годзе, пачаўшы свой чацьвёрты тэрмін на пасадзе прэмʼер-міністра Славаччыны, і хутка выклікаў занепакоенасьць сярод крытыкаў тым, што ён падрывае дэмакратыю і збліжае краіну з Расеяй. У сьнежні ён сустрэўся з прэзыдэнтам Расеі Ўладзімірам Пуціным у Маскве.
Фіца, які перажыў замах у траўні 2024 году, спыніў ваенную дапамогу Ўкраіне, адкрыта выступіў супраць будучага сяброўства Ўкраіны ў NATO і выказаўся супраць санкцый ЭЗ у дачыненьні да Расеі. Напружаньне ўзрасло пасьля ягоных заяваў пра тое, што апанэнты плянуюць ператварыць пратэсты ў спробы зьвяржэньня ўраду.
Форум