Удзельнік расейскага поўнамаштабнага ўварваньня ва Ўкраіну Нурсултан Мусагалееў прызначаны выканаўцам абавязкаў намесьніка міністра рэгіянальнай і інфармацыйнай палітыкі Арэнбурскай вобласьці, паведаміў 6 лютага кіраўнік рэгіёну Дзяніс Пасьлер.
Мусагалееў, паводле зьвестак Службы бясьпекі Ўкраіны (СБУ), быў камандзірам выведнага ўзводу 104-га палку 76-й гвардзейскай дэсантна-штурмавой дывізіі Паветрана-дэсантных войскаў Узброеных сіл РФ. Ён атрымаў званьне «Героя Расеі», узнагароджаны трыма ордэнамі Мужнасьці і мэдалём ордэна «За заслугі перад Айчынай» II ступені.
Пасьля ўдзелу ў вайне супраць Украіны Нурсултан Мусагалееў прайшоў стажыроўку ў рамках кадравай праграмы «Час герояў», створанай з ініцыятывы прэзыдэнта Расеі Ўладзіміра Пуціна.
Як паведаміў кіраўнік рэгіёну, праца Мусагалеева будзе зьвязаная, у прыватнасьці, з каардынацыяй дзейнасьці грамадзкіх арганізацый па падтрымцы ўдзельнікаў вайны супраць Украіны, вэтэранаў і іх сем’яў.
Ва Ўкраіне Мусагалеева абвінавачваюць у парушэньні законаў і звычаяў вайны. Паводле СБУ, 24 лютага 2022 году ён прыбыў у Бучанскі раён для падрыхтоўкі да наступу на Кіеў. У час знаходжаньня на тэрыторыі раёну Мусагалееў «удзельнічаў у так званых „зачыстках“, накіраваных на здушэньне руху супраціву і запалохваньне жыхароў рэгіёну», гаворыцца ў паведамленьні ведамства.
Нурсултан Мусагалееў таксама загадаў сваім падначаленым выкрасьці 29-гадовага мясцовага жыхара, які праяжджаў на аўтамабілі праз расейскі блёкпост. Яго абвінавацілі ў тым, што ён нібыта дапамагае ўкраінскім вайскоўцам будаваць фартыфікацыйныя ўмацаваньні пад Кіевам. «Пацярпелага вывезьлі ў лес паблізу пасёлка Дзьмітраўка, дзе працяглы час жорстка катавалі, а потым на загад Мусагалеева расстралялі і кінулі цела на месцы забойства», — сьцьвярджаюць у СБУ.
Украінская спэцслужба заявіла аб устанаўленьні асобаў двух падначаленых Мусагалеева, якія, паводле вэрсіі сьледзтва, расстралялі пацярпелага. Паводле ведамства, гэта намесьнік камандзіра ўзводу старшы сяржант Аляксей Калесьнікаў і камандзір 2-га аддзяленьня падразьдзелу сяржант Аляксандар Вісялкоў.
Форум