Прадстаўнікі арганізацый грамадзянскай супольнасьці праінфармавалі Камітэт па ліквідацыі дыскрымінацыі ў дачыненьні да жанчын, які дзейнічае ў рамках Рады па правах чалавека ААН, пра становішча з правамі жанчын у Беларусі, Конга, Люксэмбургу і Нэпале, гаворыцца на сайце ААН. Даклады арганізацый Камітэт разгледзіць на гэтым тыдні.
Пры сытуацыю ў Беларусі камітэт праінфармавалі прадстаўнікі праваабарончых арганізацый «Беларускі Хэльсынкскі камітэт», Human Constanta і «Наш дом», Беларускі кангрэс дэмакратычных прафсаюзаў і Кааліцыя супраць гендэрнага і хатняга гвалту. Яны, сярод іншага, узьнялі такія тэмы, як роспуск арганізацый грамадзянскай супольнасьці ў Беларусі, турэмнае зьняволеньне жанчын-праваабаронцаў і перашкоды да доступу жанчын да правасудзьдзя.
Прэс-служба ААН прыводзіць асноўныя тэзісы сьпікераў па Беларусі. Павдоле іх:
- Канстытуцыя Беларусі «не забясьпечвае эфэктыўнай абароны ад дыскрымінацыі», а правы жанчын на адукацыю і ахову здароўя абмежаваныя.
- Доступ да правасудзьдзя для жанчын у Беларусі «падарваны пастаянным перасьледам жанчын-праваабаронцаў»; на жанчын-актывістак навешваюць ілжывыя ярлыкі «тэрарыстак», нягледзячы на іх мірныя дзеяньні.
- Беларуская дзяржава сыстэматычна распускае розныя арганізацыі грамадзянскай супольнасьці, многія зь іх падтрымлівалі жанчын. Амаль 2000 няўрадавых арганізацыяў у Беларусі ліквідаваныя або былі вымушаныя ліквідавацца.
- У Беларусі надзвычай цяжка знайсьці юрыдычную дапамогу з прычыны палітычнага перасьледу і ціску на адвакатаў.
- У 2022 годзе ў Беларусі прымусова ліквідавалі ўсе прафсаюзы; шэсьць жанчын-актывістак прафсаюзаў заставаліся ў турмах.
- Сама меней 139 жанчын былі палітычнымі зьняволенымі ў Беларусі. Яны ня мелі доступу да аховы здароўя і ўвесь час зазнавалі жорсткае абыходжаньне, сутыкаліся з прымусовай працай, а таксама суровымі пакараньнямі за адмову працаваць і інш.
- Калі ахвяра хатняга гвалту ў Беларусі паведамляе пра здарэньне ў міліцыю, у міліцыі правяраюць палітычную дзейнасьць ахвяры, а не надаюць ёй падтрымку.
- Жанчыны-мігранты зьяўляюцца ўразьлівымі для гандлю людзьмі і гвалту. Хатні гвалт не зьяўляецца падставай для наданьня прытулку ў Беларусі.
Камітэт па ліквідацыі дыскрымінацыі ў адносінах да жанчын складаецца зь незалежных экспэртаў, якія ажыцьцяўляюць маніторынг выкананьня Канвэнцыі ААН аб ліквідацыі ўсіх формаў дыскрымінацыі ў адносінах да жанчын. У склад камітэту ўваходзяць 23 экспэрты па правах жанчын з розных краін.
- 29 студзеня ў незалежныя экспэрты па правах чалавека, якія дзейнічаюць у рамках Рады па правах чалавека ААН, выказвалі «глыбокую занепакоенасьць адсутнасьцю эфэктыўных расьсьледаваньняў па заявах аб гендэрным гвалце і жорсткім абыходжаньні з жанчынамі ў месцах папярэдняга зьняволеньня і папраўчых калёніях Беларусі».
- У яшчэ адной заяве ад 29 студзеня група незалежных экспэртаў ААН па Беларусі выказала «заклапочанасьць у сувязі зь перавыбраньнем прэзыдэнта Аляксандра Лукашэнкі і магчымым уплывам гэтай падзеі на і без таго цяжкае становішча ў галіне правоў чалавека ў Беларусі».
Форум