Прэзыдэнт Украіны Ўладзімір Зяленскі мяркуе, што Расея залежыць ад вайсковай дапамогі КНДР.
«Апроч першых захопленых у палон салдатаў з Паўночнай Карэі, без сумневаў, будуць і іншыя. Гэта пытаньне часу, калі нашым хлопцам удасца захапіць яшчэ. І ні ў кога ў сьвеце не павінна застацца сумневаў, што расейская армія залежыць ад вайсковай дапамогі КНДР», — заявіў Уладзімір Зяленскі ў сваім відэазвароце ўвечары 12 студзеня.
Паводле яго, Украіна гатовая перадаваць Кім Чэн Ыну ягоных людзей, калі ён зможа арганізаваць іх абмен на ўкраінскіх вайскоўцаў, якія знаходзяцца ў палоне ў Расеі.
«Для тых салдатаў з Паўночнай Карэі, якія не захочуць вяртацца, могуць быць і некаторыя іншыя шляхі. У прыватнасьці, тыя з карэйцаў, хто пажадае набліжаць мір праз распаўсюд праўды па-карэйску пра гэтую вайну, атрымаюць такую магчымасьць», — падкрэсьліў Уладзімір Зяленскі.
Улады Ўкраіны некалькі дзён таму паведамілі аб захопе ў палон параненых паўднёвакарэйскіх вайскоўцаў. Гэта адбылося 9 студзеня ў часе баёў у Курскай вобласьці Расеі.
Паводле СБУ, на момант захопу ў аднаго з вайскоўцаў КНДР быў вайсковы білет РФ, аформлены на іншую асобу, зарэгістраваную ў Рэспубліцы Тува РФ. Падчас допыту вайсковец сказаў, што дакумэнт яму выдалі ў Расеі восеньню 2024 году. Потым, паводле яго, частка паўночнакарэйскіх баявых падразьдзяленьняў на працягу тыдня вяла каардынацыю з расейскімі групоўкамі. Ён заявіў, што нарадзіўся ў 2005 годзе, займаў пасаду стралка, з 2021 году праходзіў вайсковую службу ў Паўночнай Карэі. Падчас допыту палонны падкрэсьліў, што ішоў нібыта на вучэньні, а не на вайну супраць Украіны, паведамілі ў СБУ.
Яшчэ адзін ваеннапалонны пацьвердзіў паказаньні свайго «напарніка», паведамляе СБУ. Паводле папярэдніх зьвестак, ён нарадзіўся ў 1999 годзе, з 2016 году служыць у арміі КНДР у якасьці афіцэра, снайпэра-выведніка.
Расейскія ўлады пакуль афіцыйна гэтай інфармацыі не камэнтавалі.
- Падразьдзяленьні арміі КНДР па дамове з Расеяй удзельнічаюць на яе баку ў вайне супраць Украіны.
- Паўночнакарэйскія вайскоўцы, паводле зьвестак, якія паступалі да гэтага часу, знаходзяцца ў Курскай вобласьці Расеі, куды ўкраінскія войскі ўступілі ў пачатку жніўня 2024 году. Цяпер там працягваюцца баі.
- У ГРУ Мінабароны Ўкраіны раней паведамілі, што першыя падразьдзяленьні вайскоўцаў з КНДР прыбылі ў зону баявых дзеяньняў расейска-ўкраінскай вайны 23 кастрычніка 2024 году. Пасьля ў ГУР заявілі пра каля 12 тысяч вайскоўцаў КНДР у Расеі.
- У канцы сьнежня 2024 агенцтва Yonhap са спасылкай на аб’яднаны камітэт начальнікаў штабоў Паўднёвай Карэі паведамляла, што беззваротныя страты КНДР у расейска-ўкраінскай вайне склалі 1100 чалавек. Паводле зьвестак паўднёвакарэйскай выведкі, Пхэньян, верагодна, рыхтуецца адправіць у Расею дадатковыя войскі і ваенную тэхніку.
- Аналіз зьвестак выведкі ўказвае на тое, што Паўночная Карэя рыхтуецца альбо да ратацыі, альбо да павелічэньня колькасьці сваіх вайскоўцаў, якія знаходзяцца ў Расеі, гаворыцца ў заяве.
- У NATO рашуча асудзілі пашырэньне ваеннага супрацоўніцтва паміж Расеяй і КНДР. У альянсе падкрэсьлілі, што адпраўленьне паўночнакарэйскіх войскаў на вайну ва Ўкраіну зьяўляецца небясьпечнай эскаляцыяй і парушае рэзалюцыю Рады Бясьпекі ААН.
- Кіраўнік зьнешнепалітычнага ведамства ЭЗ Жузэп Бурэль падчас візыту ў Кіеў 9 лістапада 2024 году таксама адзначыў, што прысутнасьць паўночнакарэйскіх войскаў на фронце зьяўляецца дадатковай пагрозай, і падкрэсьліў неабходнасьць дыпляматычнага ціску на Пхэньян.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум