У Міністэрстве надзвычайных сытуацый Расеі паведамілі аб вялікім пажары ў прамысловай зоне Гатчына Ленінградзкай вобласьці.
«Плошча пажару ў Гатчыне павялічылася да 1900 квадратаў. У тушэньне залучана больш за 50 супрацоўнікаў і 12 адзінак тэхнікі», — адзначаецца ў афіцыйным паведамленьні.
У той жа час прычыны ўзгараньня ў Расеі пакуль не называюць. Расейскія СМІ ўдакладнілі, што гарыць завод па вытворчасьці ацэтону, і мясцовыя ўлады вымушаны былі эвакуаваць пэрсанал. Цяпер абяцаюць правесьці неабходныя дасьледаваньні паветра, каб высьветліць узровень забруджаньня паветра хімічна небясьпечнымі рэчывамі.
У Міністэрстве абароны Расеі не паведамлялі аб атацы Ленінградзкай вобласьці дронамі. Згодна з афіцыйным паведамленьнем ведамства, у ноч на 10 студзеня супрацьпаветраная абарона Расеі зьбіла 16 украінскіх дронаў над Растоўскай вобласьцю, па чатыры — над Курскай і Варонескай, тры — над Бранскай, два — над Краснадарскім краем, адзін — над Белгарадзкай вобласьцю і 10 — над акваторыяй Азоўскага мора.
Губэрнатар Растоўскай вобласьці Юрый Сьлюсар паведаміў, што на рэгіён была інтэнсіўная атака дронамі. У некалькіх населеных пунктах пацярпелі прыватныя дамы і аўтамабілі.
«У вёсцы Крым узгараньне ліквідуюць на тэрыторыі вытворчага прадпрыемства», — напісаў Юрый Слюсар у сваім Telegram-канале.
Губэрнатар Растоўскай вобласьці сьцьвярджае, што раніцай у 07:13 адкрыты агонь, які быў на плошчы 2 тысяч квадратных мэтраў, зьліквідавалі. Ён не ўдакладніў назвы прадпрыемства. Украінскія Telegram-каналы пішуць, што дроны пацэлілі ў завод «ПластФактор».
Улады Краснадарскага краю пакуль не ўдакладняюць , якія аб’екты атакаваныя ўначы. Паводле ўкраінскіх паблікаў, у Каранёўску Краснадарскага краю пацэлілі ў пункт сталай дысьлякацыі 238-й артылерыйскай брыгады.
Расея выкарыстала на фронце больш за 2 тысячы дронаў
У Генэральным штабе Ўзброеных сіл Украіны паведамілі, што за апошнія содні расейскія войскі атакавалі прыфрантавыя населеныя пункты і ўкраінскія пазыцыі 2408 дронамі-камікадзэ. Апроч таго, расейцы актыўна выкарыстоўвалі баявую авіяцыю, якая нанесла 55 удараў і выпусьціла 76 авіябомбаў, і артылерыю.
Пад абстрэламі былі Херсонская, Запароская, Харкаўская, Сумская і Чарнігаўская вобласьці.
«Цягам апошніх содняў зафіксавалі 161 баявое сутыкненьне», — адзначаецца ў паведамленьні ўкраінскага Генштабу.
Найбольш напружаная сытуацыя, як і раней, назіраецца на пакроўскім кірунку, дзе адбыліся 42 расейскія штурмы, і курахаўскім (29 расейскіх атак).
«У апэрацыйнай зоне на Куршчыне падразьдзелы Сіла абароны Ўкраіны адбілі 25 атак расейскіх захопнікаў. Апроч гэтага, вораг нанёс 19 авіяўдараў з выкарыстаньнем 31 кіраванай бомбы, а таксама ажыцьцявіў 469 артылерыйскіх абстрэлаў пазыцый нашых войскаў і населеных пунктаў», — паведамілі ў Генштабе Ўкраіны.
У камандаваньні Паветраных сіл Украіны паведамілі, што Расея ў ноч на 10 студзеня атакавала тылавыя вобласьці краіны 72 баявым дронамі і бесьпілётнікамі-імітатарамі, каб адцягнуць увагу супрацьпаветранай абароны.
Згодна з афіцыйным паведамленьнем, украінскія сілы зьбілі 33 ударныя дроны ў Палтаўскай, Сумскай, Харкаўскай, Чаркаскай, Чарнігаўскай, Кіеўскай, Днепрапятроўскай, Запароскай, Хмяльніцкай, Віньніцкай і Херсонскай абласьцях.
«Зафіксавана пяць пацэльваньняў (прадпрыемствы і гаспадарчыя памяшканьні) у прыфрантавым раёне Чарнігаўшчыны, паранены адзін цывільны. На Кіеўшчыне зьбіты дрон упаў на шматпавярховік, пашкодзіў дом і два дзясяткі аўтамабіляў. Папярэдне, без ахвяр», — адзначаецца ў паведамленьні.
34 бесьпілётнікі-імітатары абясшкодзілі сродкі РЭБ, адзін зь іх паляцеў у кірунку Расеі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум