Рэгіянальныя ўлады Ўкраіны паведамілі аб пацэльваньні ў інфраструктурныя аб’екты.
Расея вяла абстрэл з розных кірункаў — з поўдня, поўначы і ўсходу. У апэратыўным камандаваньні Паветраных сіл Украіны папярэджвалі аб імавернасьці балістычнага ўдару.
Пасьля завяршэньня павтранай трывогі ў апэратыўным камандаваньні Паветраных сіл Украіны паведамілі, што Расея атакавала Ўкраіну 40 бесьпілётнікамі і 21 ракетай розных тыпаў. Сілы супрацьпаветранай абароны змаглі зьбіць 6 ракет і 16 дронаў, яшчэ 24 бесьпілётнікі абясшкодзілі пры дапамозе радыёэлектроннага ўзьдзеяньня.
Пад прыцэлам зноў інфраструктура
Улады Сумскай вобласьці паведамілі, што ў ноч і раніцай 31 сьнежня расейцы абстралялі памежныя тэрыторыі ў Шосткінскай і Сьвескай грамадах. Удар быў камбінаваным — спачатку бесьпілётнікамі, а потым і ракетамі.
Паводле ўладаў, у Шосткінскай грамадзе абстралялі інфраструктурны аб’ект. Аб маштабах удару пакуль не паведамляюць.
Расейцы атакавалі Мікалаеўскую, Палтаўскую, Віньніцкую, Харкаўскую, Чаркаскую, Чарнігаўскую, Днепрапятроўскую і Кіеўскую вобласьць, а таксама Кіеў.
У Расеі заявілі аб зьнішчэньні над сваёй тэрыторыяй амаль 100 дронаў
У Міністэрстве абароны Расеі заявілі, што цягам ночы зьнішчылі 68 украінскіх бесьпілётнікаў. Найбольш (25) над тэрыторыяй Бранскай вобласьці, 17 над анэксаваным Крымам, 11 над Краснадарскім краем, 10 над Смаленскай вобласьцю, два над Цьвярской і па адным — над тэрыторыямі Растоўскай, Курскай і Калускай.
У расейскай адміністрацыі Крыму не паведамляюць аб наступствах зьбіцьця дронаў. «Папярэдне, зьбілі 4 паветраныя цэлі над морам і два марскія бесьпілётнікі паблізу берага», — напісаў у сваім Telegram-канале губэрнатар Севастопаля Міхаіл Разважаеў.
Адначасова кіраўнік расейскай адміністрацыі гораду папярэдзіў грамадзян аб адказнасьці за здымкі працы сіл супрацьпаветранай абароны. Ён паведаміў таксама аб увядзеньні забароны на выкарыстаньне піратэхнікі.
Губэрнатар Смаленскай вобласьці Васілій Анохін заявіў, што аскепкі аднаго са зьбітых бесьпілётнікаў упалі на тэрыторыю нафтабазы ў Ярцаўскім раёне і справакавалі пажар.
«У выніку адбыўся разьліў паліва і пачалося згараньне гаруча-змазачных матэрыялаў. Цяпер выратавальныя службы лякалізуюць наступствы. Пагрозы жылым аб’ектам няма», — напісаў Васіль Анохін у сваім Telegram-канале.
Улады астатніх абласьцей, дзе нібыта зьбівалі ўкраінскія дроны, увогуле не паведамляюць аб наступствах работы сіл супрацьпаветранай абароны Расеі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум